Ka Women’s Welfare Organisation ka Seiñraij Jowai ynne ka sngi da pynman ko ya ka yachemlang ki khon kynthai ka Seiñraij Jowai heiwa u MLA ka Amlarem, u Lahkmen Rymbui da man u kam u kongsan.
Ha kani ka sngi da em ka yalang wa pynlai da ka Chairperson ka WWO, ka Dr. Waisa Sumer wei da yoh i ngoohblai na ka Hima Lakiang kawa man ka Treasurer ka WWO.
U President ka Seiñraij Jowai, u H. Toi hawa e yei klam da ong u wa ynne ka sngi man ko ka wow pynemburom ya ki kynthai kamwa da leh nadooh nachwa wei kamjooh wow pynchlur ya ki khon khynroo khyllood ka Seiñraij.
Da ong u wa i chah pynkupburom kiwa lehbha pynyoo ko ya i tyrchaaiñ wa mih nei kreh chitom yong ki.
Kam u kongsan u Lahkmen hawa e i klam da yaroh u ya ka WWO wa da chimkhia ko wow e mynsien ya ki khon wa wanrah naam ya ka chnong ka Raij wow man leh kam ka nuksa ya ka mynried.
Da ong u wa em chiboon i kylla nadooh wa sdang ya ka WWO wei emkaam ya ki manbei u yatoh ki waka juk wa katni deiwa e nongmuna yei kylla ka Behdieñkhlam ha ki 50 snem nachwa wa katni, i pynkhai im biang ya ka Chaad Sukra wa kiwi kiwi.
Chooh chooh da ong u wa i wan ka Social Media wanrah i chiboon i kylla kamtæ emkaam wow man kiwa syndong bha.
Heijooh i por da kyntu u ya ki manbei manpa wow pynchlur ya ki khon yong ki wow man kiwa em i mynsien yaleh wow tia chaphrang.
Kiwi kiwa da klam ha kani ka yalang kynthup ki ya ka Soneeta Passah, Vice Chairperson kawa da puræ ya i pyrtuid ki Chairperson wa Secretary warim ka WWO wei da yoh ya ki kyntien khublei na ka Ridaka Lamar ka Secretary ka WWO SRJ.
Ha kani ka sngi da pynkupburom leh ya ka Aloma Passah wa ka Lamabai Lakiang kiwa man ki Chairperson wa ka Secretary wa nyngkong dooh ka Womens Wing (i pyrtuid warim ka WWO) ha ki snem 1989-90.
Chooh chooh kam ka dak wow pynchlur ya ki khon ka Niamtre hapoh ka Seiñraij Jowai da pynkupburom leh ya ki 17 ngut wa da lehbha ha ki kyrdan waphær waphær nadooh SSLC hadooh PhD ha uni u snem.
Ya kani ka sngi da pynphooh da ki chaad wa ki rwai.
Discussion about this post