Ka seiñ Hynniewtrep Integrated Territorial Organization (HITO) Narpuh Circle, ha ka 9 tarik uni u bnai da phah chithi ko cha ka Meghalaya State Pollution Control Board(MSPCB) lyngba u Deputy Commissioner ka East Jaiñtia Hills District, u Shivansh Awasthi yow pynsñiaw yei pyrchah wa joor hajrong i thmu yong ka Meghatop Cement Pvt Limited wow pynman ya ka Public Hearing ha ka tarik 18 uni u bnai yow chna ya ka karkhana pynmih khyndaw-bilat (Integrated Cement Plant of capacity 3.3 MTPA Clinker, 2.8 MTPA Cement wa 16MW Waste Heat Recovery System) ha chnong Wahiajer Narpuh, East Jaiñtia Hills District.
Ka seiñ da pyrchah ko neidaw wa ini daw wanrah ko yei tooid ki baar jylla ha East Jaiñtia wa chyrkhei iwa daw ktah yei kamai kajih ki pateiñ wow wan wei hadooh ka synchaar chnong leh daw jæd daw pra ko.
Chooh chooh da ong leh wa ki karkhana kiwa dang krehkaam katni da em ki hadooh 8 tylli hapoh ka East Jaintia Hills wei da yoo hadooh katwon pynsih wei pynjakhlia ki ya ka bei rymaw najrong wa joor wym yoh khih yoh kreh ki bru wei iyi i myntoi wow wanrah chooh chooh ya ki karkhana pynmih khyndaw-bilat yow maad yei eh wa lephaw jait nadooh wa sih ka umbaam umdih wei ki khloo ki kjam leh da lut ki.
Ka seiñ da maham ko leh ya ka sorkar wym toh de u e bor yei thmu wow chna ya kam kini ki karkhana hapoh East Jaiñtia wei ka sorkar toh u pynsangeh noh ko ya kani ka Public Hearing.
Ka seiñ da ong ko leh wa heithaw ki karkhana wow wanrah da ka Training Centre hapoh ka District yow sikai kreh Electrical, Mechanical, Automobile wa ki Computer khnang wa ki khynroo khyllood yow ye ki wow yoh kreh ha kini ki karkhana.
Discussion about this post