Ha ka 4 tarik u Naichiphaw hapyrdi i wan sakhilang u Wailadmiki Shylla, Montri sorkar kam u kongsan, wa ki waheh wasian, manbei manpa ka Seinraij neiliang ka Women’s Welfare Organisation Seinraij Jowai da pynman ko i pynkup burom kyrpang ya ki 18 ngut ki khon khynroo khyllood kiwa yoh 75% chaneiñ ha ka SSLC wa ka HSSLC Examination 2025.
Ha ka yalang wa yoo chongkun yong kani ka sngi da yoh yei klam pdiang burom na ka Soowanki Lakadong, Chairperson WWO wei kam wow kdar luti ya ki bynta wa chakhmat, ka Kongka Siangbood, Langdoh Raij Jowai da e da siang ko ki kyntien pynap blai pynap syiem neitæ i khana pynsñiaw yei parom wa tbian ya ki kaam wa yahkhmat ka Women’s Welfare Organisation nadooh u snem wa sdang ha u 1989 hadooh u snem 2025 da ka Iomoo Kyndiah, Asst. Secretary WWO katwa hei pynkut won ka Hunbeitki Dkhar, Asst. Secretary, WWO e ko ki kyntien sñiawngooh.
Ka Finland Passah, kawi na kiwa yahkhmat ka WWO yong ki por wa dalai, hawa klam da ñiawtang ko ya ki waheh ka Seinraij kiwa da e mynsien wow sdang ya ka seiñ kynthai, iwa kyrpang chooh leh hei klam yong ka da pachat ko ki kyntien snieñ kyntien kroo wei e mynsien ya ki khon khynroo khyllood kiwa da yoh yeini i pynkup burom.
U Hercules Toi, President Seiñraij hawa klam ha kani ka yalang da khriñ u yei pyrkhat pyrdaiñ ki khon khynroo khyllood deiwa ong ha kani ka juk wa katni ym biang du wow yoh ya ka Percentage waheh lada ka mynstep mankawi ki khynroo khyllood man ko kawa wiarnar wiarluti.
Chooh chooh da kdar u leh wow khana pynsñiaw chaphang ka thong krehkaam ka sorkar lyngba ka National Education Policy 2020 neibynta i myntoi yong waroh ki khynnah puræ. Katkam ka NEP, da ong u wa i puræ puthi ki khynnah toh u man iwa lailang chirup wa ki Vocational Training, iwa mut lada ki khynnah ki wym ye u yoh ya ki Marks næ Percentage wa heh u yohlaad won ki u pynpliah yei tip i chemphang wei sap wa em ki lyngba ki Vocational Training.
Katwa u Wailadmiki Shylla kam u kongsan hei klam da ong u wa ka sorkar India næ ki ri ka pyrthai dang chibet chipor sdang ki u pynkupbor ya ki kynthai næ u pynmih ki aiñ yada yei hok ki kynthai katwa kyruiñ won u pait hapoh ka jaitbru yong i, nadooh na warim i pynkupbor næ i kheiñ burom ya ki kynthai da man iwa kyrpang kyntang.
Chooh chooh leh da kyrsu kyntu u ya kiwa yahkhmat ka WWO wow chimkhia ki leh u pynman ki yachemlang yow yaklam kyrpang hajrong i hok ki kynthai deiwa yakrehlang chirup wa ki chnat krehkaam ka sorkar neibhah katni ki sngi ka sorkar em ko chiboon ki bynta wow leh heiyatoh wa ki manbei næ ki khon kynthai khyllood.
Katwa heiyatoh won ki khon khynroo khylllood kiwa da yoh yeini i pynkupburom, e u i kitbok kitrwiang wei ong leh u kynmoo ya samboi man da em phi hei kyrdan man heh man haaiñ, ya myllin phi ya ka niam ka rukom ka dustur riti. “Kynmoo wa phi toh em phi i kaamram wow su kylliang u leh iyi lei iyi iwa bha tam hapoh ka Seiñraij kamjooh hapoh ka imlang sahlang.
Neiliang ka Seiñraij Jowai ha kani ka yalang da chim ko leh wow pynkup burom kyrpang ya u Wailadmiki Shylla hajrong i yoh yong oo wow ku kyrdan kam u Cabinet Minister ka sorkar wa toh u pait u ioo ya ka Sports & Youth Affairs Department, Health & Family Welfare Department wa Home (Passport) Department.
Ki khon khynroo khyllood ka Ñiamtre kiwa da yoh yeini i pynkup burom ha kani ka sngi em ki 18 ngut wa kynthup 8 ngut neibynta ka SSLC kitæ toh ka Sayalang Shallam kawa yoh 89.5%, u Deisakiru Nanghuloo uwa yoh 85.5%, ka Insabet Syngkon kawa yoh 82.16%, ka Ridatreka Passah kawa yoh 83%, ka Iaraplangki Sumer kawa yoh 83%, u Manbhalang Bareh uwa yoh 82.66%, u Damechantre Dkhar uwa yoh 82.33% wa ka Mayaika Dkhar kawa yoh 82.5%.
Katwa 10 ngut won neibynta ka HSSLC toh ka Mayanka Pde kawa yoh 93.2%, u Rapmi Toi uwa yoh 90.2%, ka Daphipaia Passah kawa yoh 81.16%, ka Kiwadaki Laloo kawa yoh 80.8%, u Deibormi Rngad uwa yoh 79.6%, ka Ebiangmidaka Laloo kawa yoh 78.8%, ka Deiniwanyoo Challam kawa yoh 77.8%, ka Tngen i Haka Kyndiah kawa yoh 77.8%, u Kerioo Kyndiah uwa yoh 77.8%, ka Dakaru Lapasam kawa yoh 76.1%, u Budwanmi Dkhar uwa yoh 77.8% wa ka Lana I Ka Rymbai kawa yoh 77.8%.
Yei naam Seinraij Topper of the Year 2025 yong ka SSLC da yoh da ka Sayalang Shallam kawa dang pteiñ katni yei purae Class 11 ha Ram Krishna Mission Hr. Secondary School, Sohra katwa ha ka HSSLC da yoh da ka Mayanka Pde kawa dang pteiñ katni yei puræ MBBS ha Padit Jalwaharlal Nehru Medical College, Raipur-Chhattisgarh.
Najrong kini kiyi kiyi da pynchoh pynchongchit chooh leh ya kani ka sngi da i rwai na ki manbei wa i Chaad Pliang wa da chimbynta da ki khon khyllood ka Seinraij, Jowai.
Discussion about this post