Ki ar ngut ki khon khynroo khyllood kiwa man kam ki khloor yalehke Sports ka West Jaiñtia Hills kiwa da rah naam ya ka jylla wa ka District hi waroh kawi deiwa yoh khur takma hei lai chimbynta ha ki rynsan yalehke wa pynman ha Mumbai wa New Delhi ha u bnai May 2025, ynne ka sngi neiliang ka yung krehkaam u Deputy Commissioner ka West Jaiñtia Hills District kam ka dak i tipmit wei e mynsien ya kini khynroo khyllood wa kynthup ya ka Sawakani Lakiang wa u Alexander Lyngdoh da pynkup burom kyrpang ya ki ha ka yalang wa da pynman ha Conference Hall u DC.
Ya kini da pynkup burom da u Deputy Commissioner, ka West Jaiñtia Hills District, u Abhinav Kumar Singh, chirup i emlang ki ADC, EAC wa kynthup ya u GLM Mylliem, ka HML Kynta, ka B. Blah, ka DV Lyngdoh, u F. Passah najrong kiwa kreh ka yung krehkaam u DC wa kiwa ha-yung ha-sem kini kiwa chah pynkup burom.
Ka Sawakani Lakiang toh kawa da yoh khur takma ksiar hei yakob pynyoo dohksah ka World Fitness Federation Body Building SAARC Women’s Bikini Model Category, World Fitness Federation wa pynman da ka South Asian Association for Regional Cooperation ha Mumbai ha ka 19 tarik u bnai May 2025.
Katwa u Alexander Lyngdoh won toh uwa yoh wa ar ha ka Left Hand Category wei yoh wa le won u hei kyrdan Right Hand Category i yakhun kti ha ka Asian Arm Wrestling Championship, 2025 wa da pynman nadooh ka 3 tarik hadooh 11 tarik u bnai May 2025 ha New Delhi.
U Deputy Commissioner hawa klam ong u neiliang yong oo kamjooh ki bor District hi daw pteiñ e mynsien wei kyrchaan ya kini ki ar ngut lyngba ka Chief Minister’s Youth Development Scheme deiwa paitbniah ha iwon iwon i rukom wa ye u yarap ya ki, kamjooh leh lyngba ki Company wa ka yung krehkaam u DC yakrehlang ko.
Da yoh leh i klam na ka HML Kynta, ADC wa na kini ki khynroo khyllood wa chah pynkup burom, katwa yei klam u Alexander Lyngdoh neidaw wa man u u bru wa duna i bor klam da pynyoo u da ki dak kti heiwa da yarap wow batai pynsñiawthooh da kiwa ha-yung yong oo.
Discussion about this post