U Montri Rangbah ka jylla, u Conrad K. Sangma chirup wa u Montri ka chnat Sports and Youth Affairs, u Banteidor Lyngdoh ynne ka sngi da pynkup burom ki ya ki khloor yalehke ka jylla kiwa da mihkhmat ya ka jylla wa ka ri ha ki yakob yakhun-kti (Arm-Wrestling) wa i pynyoo-dohksah (Bodybuilding) deiwa saam ka poisa kawa dapoi T. 12.50 lak cha ki 11 ngut.
Ya ka yalang ynne da pynman da ka chnat Sports & Youth Affairs wow pynkup burom ya ki khloor kiwa da mihkhmat ya ka ri ha ka XLIII World Arm-Wrestling Championship, ha ka XXIV World Para-Arm-Wrestling Championship ha Antalya Turkey, ha ka PRO AM Universe Championship ha Bangkok, Thailand wa ka WFF PRO AM Asia Pacific ha Ho Chi Minh City, Vietnam.
Hawa e yei klam ha kani ka sngi u Conrad da e khublei u ya waroh kiwa da yoh takma kamjooh leh kiwa yoh wow chimbynta neibhah wa da wanrah naam ki ya ka jylla wa ka ri ha kini ki lympung wa da pynman cha baar ri.
Da ong u wa ka sorkar da kreh ko ha ka luti wa biang wow hikai wei wow yahluti ya ki khloor yalehke wow chimbynta ha ki yalehke hapoh ka ka ri deiwa wanrah ya ki thaw wow pynchlur ya ki khynnah wow poi ki ha ki yakob wot cha baar ri.
Chooh chooh da ban joor u hajrong i wanrah ya ka Sports Policy wa ka Youth Policy toh wow pynchlur ya ki khynroo khyllood wow rah naam ki ya ka jylla deiwa pynbiang thaw yalehke kam ki Stadium wa kiwi kiwi de deiwa yooluti leh wow booh ya iwa emkaam ha ki District, ki Sub-Division wa ki Block ha kylleiñ ka jylla.
Heijooh i por da pyntip u wa da mang T. 500 klur wow pynpliah ya ki thaw yaleh Sports ha ka jylla wa har rukom khnang wow myntoi ki khynroo wa yalehke ka jylla deiwa kyrmen wa kini ki thaw daw ye ki wow pynmih ya ki khloor yalehke Sport wa sakhiat.
