Ka yung krehkaam u Deputy Commissioner, West Jaiñtia Hill District ryngkat ka yung krehkaam u District Sports Officer ka West Jaiñtia Hills ynne ka sngi da pynkup burom ki ya ki chynrang wa kynthai wa yalehke Sports ka District kiwa da rahnaam yaka District lyngba ki takma waphær waphær wa da yoh ki haka 2nd Northeast Olympic Games 2022 kawa dang dep pynman ini wa dep.
Ya kani ka pynkup burom da pynman ha Training Hall u DC ryngkat i emlang u MLA ka Jowai u Wailadmiki Shylla, u Deputy Commissioner, u B.S. Sohliya, u District Sport Officer, u K. Passsah, u M.A. Challam ADC, West Jaiñtia Hill District, ki dkhot ka West Jaiñtia District Sports Association wa kiwi kiwi.
Kiwa chah pynkup burom ha kani ka sngi kynthup ki ya u Kyrshanlang Shylla, u Marso Kyndait, ka Durka Nartiang, ka Damika R Lyngdoh, u Kermi Biam, u Kelbinus Biam kiwa da chimbynta ha ki yalehke haka Athletics.
Haka Badminton kynthup ya u Mebanker Shullai wa u Gregoreo Passah, haka Boxing u Baiamutlang Sungoh wa u Badonkupar Synnah, haka Football u Oresterwell Lyngshiang, u Saveme Tariang, u Figo Syndai wa u Wadajiedkynsai Ryngkhlem.
Haka Karate u Ram Lanong, haka Taekwondo, u Honda O Hi Papang, haka Wrestling u Echwamidao Phawa haka Golf u Jason Passah.
Ha kani ka jooh ka sngi da pynkup burom leh ya ki Coach kitæ u Pleasantly Synnah, u Mingson Rymbai wa u Chibaitmi Langstang.
Hawa e yei klam, u DC da e khublei ko ya kini wei da kyntu u leh yaki wow nang pynjanai chooh chooh khnang wow ku ki neipor cheipor neibhah ka Sports hi ha kini ki sngi da ku bha ko chakhmat wei da man ko leh ka laad kamai.
U Wailadmiki hawa e yei klam da kyntu u wow pdiang ki ya kani ka pynkup burom dei mynsiem wa sbun hanla man i iwa khian leh.
Da kyntu u leh ya ki wow nang lehbha chooh chooh neibhah wa wot ka sorkar leh ha kini ki sngi da pynchlur ko deiwa wai boon ki laad ki luti ym toh kam ha ki por wa nachwa lada em i sap lane i kreh chitom katwon katwon leh ym poi cheiwon cheiwon.
Da pynrap u leh wa katni ka sorkar da dep mynjur ko yaka Sports Policy neibynta wow pait kyrpang ya kiwa em yei sap ha ka Sports wei leh ka song yarap poisa neibynta kiwa yoh takma da ku ko.
Ha kani ka sngi kiwa yoh takma ksiar da yoh ki T. 10,000, kiwa yoh takma rupa da yoh ki T. 7000 katwa kiwa yoh takma tama da yoh ki T. 5000 wei kani ka poisa toh kawa da kynchew da ka yung krehkaam u DC waka yung krehkaam u DSO heiwa ka sorkar jylla da dep ko wow pynkup burom wei e yarap ya ki ini wa dep.
