theme-sticky-logo-alt
theme-logo-alt
Advertisement ad1
Advertisement ad1

Pynkup burom u Dolloi ka Elaka Jowai ya ki chakri niam ki Soo Langdoh

U Dolloi ka Elaka Jowai, u Wh. Puramon Kynjing dei sñiawngooh sñiawburom ya ki chakri niam yong ki Soo Raij- Soo Langdoh kiwa da chakri yei kaam niam 15 snem lynter, ha ka sngi Muchai 26 tarik Kmaichonglad 2021 hakhmat ka Dorbar ki Soo Langdoh wa man ha madan Lariang, Ialong da chim u wow pynman i pynkup burom heiwa ha kani ka sngi najrong ki chakri niam yong ki Soo Raij-Soo Langdoh da sakhilang leh ki yahkhmat yong ki Seiñraij wa kynthup na Seiñraij Jowai, Seiñraij Chyrmang, Seiñraij Tuber wa Seiñraij Ialong.

Ha ka yalang wa yoo chongkun yong kani ka sngi hei pynlai u Raymon Nartiang, Pator Raij Jowai, u Dolloi, ki Soo Langdoh, ki Wasan chirup kiwa boon walang wa wan sakhi ya kani ka Dorbar da yeiñ ki leh wow pyndep yei ngooh Blai ngoh Syiem iwa man katkam ka rukom dustur dei suit i choor wei pyrnah pyrjin wada khreh da tayaar da u Dolloi wa na ki Soo Langdoh.

Ki chakri niam yong ki Soo Langdoh kiwa da pynkup burom ha kani ka sngi toh la Kongka Siangbood wa u Samboon Siangbood kiwa man ka Langdoh wa u Langdoh ka Raij Jowai, u Dr. H.C. Pakynteiñ (Sangot Pakynteiñ), U Valentideo Paswet (Sangot Paswet), u Niyooki Shadap Passah (Maji), u Long Passah (Harna) wa u Tribal Toi (Dhulia) neitae u Paka Shylla, (Tymmen Shylla) yong ka Raij u Kongwasan Chyrmang, u Kiang Phawa, (Tymmen Raij), Raij Tuber wa u Khain War (Tymmen Papiah) Raij Ialong.

Najrong i pynkup burom, Ki yahkhmat yong ki Soo Raij wa kynthup yow Arwotki Sumer, General Secretary, Seiñraij Jowai, u Ker Lakiang, Secretary Seiñraij Chyrmang, u H. Phawa, President Seiñraij Tuber wa u Pyrkhat Shylla, President Seiñraij Ialong hei e kyntien ha kani ka Dorbar da yaroh ki ya u Pa Dolloi wei da e mynsien ki leh ya ki chakri niam yong ki Soo Langdoh wow nang imsngi chooh ki u pynjanai wei u pynskem pynskit ya ka niam rukom dustur riti wei wow wanrah leh i yakrehlang wa yajan hapyrdi ki Soo Raij-Soo Langdoh da ka luti yong i ya sñiawthooh yumut wei yatylli.

Chooh chooh ha kani ka sngi najrong ki kyntien na u Pa Dolloi kam u khlieh ka niam khlieh ka Elaka da yoh leh u ap u sñiaw yei klam i khanna na ki chakri niam yong ki Soo Langdoh wa i e wyrta yong ki Soo Langdoh hakhmat ka dorbar ya ki sngi ki tayaw yong ka Chaad Niam Behdieñkhlam yong u snem 2022 heiwa ha Raij Chyrmang u man ko ha ka 1 tarik u Naisan, ha Raij Jowai ha ka 14 Naiynñiaw, ha Raij Tuber 22 tarik Naiynñiaw wa ha Raij Ialong 7 tarik Naisaphra.  

Share this:
Previous

E khublei sñiawngooh ka Dorbar Chnong Mookyndur ya u Sniawbhalang Dhar

Next

Wa joor ka yor sneiñ u Rijiju ya kiwa lai cha Tawang wow thooh yutip chwa