Jowai: Ka yungkrehkaam u Dolloi ka Elaka Jowai dei sñiawngooh sñiawburom ya ki yahkhmat yong ki Soo Raij neibynta i kitkhia yong ki wow kreh yei kaam iwa yatoh wei pynneh pynsah ya ka niam ka rukom, dustur, riti ha kani ka sngi Hat 8 tarik Kmaichonglad 2019 hakhmat ka Dorbar ki Soo Langdoh wa man ha madan Lariang, da chim ko wow pynman i pynkup burom heiwa ya kani ka bynta da yndep da u Dolloi yong ka Elaka u Puramon Kynjing hei sakhilang ki waheh wasian, manbei manpa, khynroo khyllood wa wan cha kani ka Dorbar.
Ha kani ka sngi chwa wow yoh i pynkup burom, neiliang u Wansalan E.Dhar, Secretary Elaka Jowai da yieñ u wow khana, pynsñiaw yei parom watbian yong ki yahkhmat na ki Soo Raij kiwa da yoh yeini i burom katwa neiliang won u Pa Dolloi da ong, hadien i lai luti wow kit ya ka lyngkor kam u khlieh ka Elaka yoo, chem u wa ki yahkhmat yong ki Soo Raij em ki ka yukit wakhia liang wanang hei wow pynskem pynskit ya ka niam, rukom, dustur, riti yong ki khon u Niawwasa hapoh ki Soo Raij-Soo Langdoh, kamtæ dei pyrkhat wakhia ha kani ka sien lai luti wa san yong kani ka Dorbar ki Soo Raij-Soo Langdoh ha madan Lariang booh thong u wow pynkup burom ha uni u snem neibynta i burom ki yahkhmat yong ki Soo Raij iwa man ya ki General Secretary wa ya ki President.
Choh choh khana u leh wa ha kani ka sien dang man i pynkup burom ya ki yahkhmat yong ki Soo Raij katwa ha kiwi ki snem wow wan u man i pynkup burom leh wot ya ki chakri niam yong ki Soo Raij-Soo Langdoh.
Ki yahkhmat yong ki Soo Raij kiwa da yoh yeini i burom hakhmat ka Dorbar ki Soo Langdoh ha uni u snem toh u Jolbi Sana, General Secretary wa u Bewil Shylla, President yong ka Seinraij Tuber, u Arwotki Sumer, General Secretary wa u O.R. Challam, President yong ka Seinraij Jowai, u Lito War, General Secretary wa u Marki Mulieh, President yong ka Seinraij Ialong wa u Kerlang Lakiang, General Secretary kamjooh yow President yong ka Seinraij Chyrmang u Perry Shylla.
Discussion about this post