Ka Rotary Club Jowai kamwa jooh man khlieh ki snem, ha uni u snem leh da kynmoo burom ko ya ka sngi sdang yong ka seiñ kawa tip deiwi i kyntien kam ka Charter Night nae ka janmiet yong i lehkmen lehsñiawbha ki dkhot ka seiñ waroh.
Ya kani ka yachemlang da pynman ha ka Mulong 30 Duiatra 2021 ha Infinity Conference Hall Mooralong heiwa ki dkhot ka seiñ watip kam ki Rotarian wa ki dkhot khynroo wa tip kam ki Rotaract da wan ki wow emlang chirrup i sakhilang u Rotarian Dr. Vincent T. Darlong, Vice Chancellor MLCU Shillong kam u kongsan.
Ka bynta wa nyngkong ha kani ka janmiet toh ka Chartered Night Celebration heiwa u President ka seiiñ u Rotarian S.K. Lato MPHF da man u kam u chongknor wei kam wow kdar luti ya ki bynta wa chakhmat katkam ka dustur krehkaam ka Rotary International deiwa rwai leh ya ka National Anthem wei puræ ya ki kyntien soskular hei yahkhmat u President iwa da pynbood da waroh ki Rotarian neitae pynbood leh ki kyntien pdiang burom da u Rotarian R. Nongtdu.
U Rtn. S.K. Lato hawa e kyntien, da kdar u wow niawtang ya ki dkhot kiwa da jooh ya embynta wow kit u bah ya ka lyngkor ka seiñ wei kyrpang leh ya ki ar ngut ki dkhot ka Rtn E.F. Gatphoh Chartered President wa u Rtn. D. Majaw, Charter Member kiwa imsngi miet sngi u kreh ya ki wa boon ki kaam neibynta i burom ka seiñ waroh kawi.
Ka Rtn. E.F. Gatphoh, MPHF hawa klam ha kani ka janmiet da kdar ko wow pynsñiaw u khana chaphang ka Rotary Club Jowai kamjooh chaphang ka Rotary International kam kawi na ki seiñ wa em ha chityllup pyrthai wei kawa imsngi u kreh yei miat i bha ka imlang sahlang yong ki bru wa chong chnong ha kylleiñ ki thaw wei da e mynsien ko leh ya ki para dkhot wow imsngi chooh chooh u kreh yei kaam da ka luti yong i ya maya wei ya sñiawthooh yumut.
Ka bynta wa bood yong ka yalang ha kani ka janmiet toh ka Vocational Service Award kawa da pynlai da u Rtn. Deibormi Toi, Director Vocational Service wei ha uni u snem ka Rotary Club Jowai da chim ko wow pynkup yeini i burom ha u Sunday Morning Tariang uwi na ki bru wa imsngi u pynwyrngia ya idæ ha ki kaam yalehke Sports nadooh u snem 1969 wei da man u leh uwi na ki khon ka Ri Loom Jaiñtia uwa da rahnaam rah burom ya ka District, ka kylla ha kiwa boon ki yakob heiliang ka Football wa ka Badminton, neitæ ya ka Dorbar Chnong Moolamylliang, East Jaiñtia Hills District kam kawi na ki chnong wa khooid wa pliah.
Chooh chooh ha ka yurim wow pynkhlan yei rukom krehkaam wei pynboon ya ki dkhot ka seiñ, ha kani ka kynti ka Rotary Club Jowai da yoh ko leh wow pynskem dkhot ya u Yoophrangki Laloo wei ya kani ka bynta da pyndep da u kongsan Rotarian Dr. Vincent T. Darlong.
U Rtn. Dr. Vincent T. Darlong hawa e kyntien kam u kongsan ong u man iyi iyi iwa sñiawsuk wow yoohkjat hapoh ka chnong Jowai, ka chnong kawa da yoh u wow maad u chem yei sbun mynsien yong ki bru hapyrdi i lai luti yong oo na Tripura cha Shillong. Neitae kdar u leh wow pynsñiaw yei chem yong oo chaphang ka Rotary kam u bru uwa da im u chakri ha ki thaw waphær yong ki ri kamjooh cha baar wei chooh chooh e u leh ki kyntien sneiñ kyntien kroo wei e mynsien ya ki dkhot ka seiñ kamjooh ya ki bru kiwa da pynkup burom ha kani ka sngi.
