Ka Annual School Sports Meet 2024 wa ar sngi yong ka Government Girls’ Higher Secondary Jowai wa da pynman ha madan Kiang Nangbah Stadium da poi noh ko chawa kut haka 28 tarik uni u bnai deiwa chimbynta ki khynnah skur ha ki jait yalehke Sports waphær waphær wa da bhah ha jar jiar ki liang wa kynthup yaka Petunia, Lotus, Rose, Lily waka Pansy Group.
Ki jait yalehke wa da pynman kynthup i yei phet pyllah wa boon jait, ka Javelin Throw, Discus Throw, High Jump, Long Jump, Sack Race wa kiwi kiwi.
Da wan wow pynhaap pyrda ya kani ka Sports Meet da ka P. Shullai, Principal warim ka Government Girls’ Higher Secondary kawa da chongngiah leh kam ka DSEO, West Jaiñtia Hills.
Hawa e yei klam da pynkynmoo ko ya ki khynnah skur wa i yalehke Sports man i iwa emkaam bha hei im kam ki khynnah, neibhah wym du wa pynyoh i yei miat dur hei doh i pran, i chait i khlan tangwa yoh leh yei kmen i sñiawbha.
Ong ko leh wa nachwa yaka Sports da chim kam ka jait lehke don hi, tangwa ha kini ki sngi da man ka laad wow wai luti yei im wa chaphrang, wei wow im jakpoh leh na ka.
Kamtæ kyntu ko ya ki khynnah skur wow chimkhia ki yei kaam Sports deilang wa i puræ puthi.
Ha kani ka sngi ka P. Shullai da saam ko leh ya ki khusnaam Best Athlete neibynta ka Under-14, Under-16 wa Under-18.
Neitæ yei naam ‘Best Home’ da yoh da ka Lotus Group yei naam ‘Best Discipline’ da yoh biang da ka Lotus Group katwa yei naam ‘Best March Past’ da yoh da ka Lily Group.
Da pynphooh pynphieñ chooh chooh ya kani ka Sports Meet da ka Drill waka March Past.
Discussion about this post