Ka Jowai Co-Operative Urban Bank Ltd, kawa da seiñ nadooh u snem 1976 da ki Politician kiwa em hapoh ka JHADC, ha ka 26 tarik uni u bnai da pynhaap pyrda ko yei lehkmen dap 50 snem i e chakri ko ya ki paidbah heiyatoh waka kaam poisa poilaiñ nadooh i pynlang poisa, i e ram wa kiwi ki jait chakri haka yalang wa da pynman ha Auditorium ka District Library, Mynthong Jowai.
Ha kani ka sngi pynhaap pyrda, u Thombor Shiwat CEM JHADC da man u kam u kongsan, u Moonlight Pariat, EM JHADC kam u symbood kongsan hei emlang u Bison Roy Iano, MDC JHADC, u Dolloi ka Elaka Jowai, u Puramon Kynjing, ki Shareholder Member wa kiwi.
U B. Phyrngap, Asst. General Manager Jowai Co-operative Urban Bank hawa khana yei lai luti ka Bank nawa sdang, khana haroh u ya ka thong wa chakhmat ka Bank hei wow e i chakri wa rap bha, u pynkhlan heiliang ka Technology, u pynheh chooh chooh yaka CBS Platform hei rukom wow chngaaiñ ki paidbah.
Da rai ki leh wow psiah hapoh ka Umbrella Organisation yong ki Urban Co-operative Bank ha India kawa tip kam ka National Urban Co-operative Finance and Development Corporation (NUCFDC) khnang yow yoh boon i myntoi neibynta u pynkhlan ya ka Bank.
Da e khublei haroh u ya waroh kiwa kreh kani ka Bank nadooh kiwa dang em hadooh ki wym em de leh wa toh lyngba i chimkhia ki jar jiar i kaam tæ ku kani ka Bank hadooh kamwa man katni.
U Moonlight Pariat hawa klam da yaroh u yei lai luti kani ka Bank, deiwa kyntu haroh u ya kiwa kreh wow lai li mih yachem wa ki Customer cha ki chnong ki thaw ki yung ki sem yong ki neibynta u pynku ya ka Bank, neibhah deiwa chong yang u wan ki bru ym smat ku ka Bank.
Neiliang u Thombor Shiwat kam uwa jooh yatoh kaam bha ha kani ka Bank yaroh u yei rukom e chakri kani ka Bank cha ki paidbah, neibhah wa oo hi chem u kawa ye bha u yarap ya ki paidbah ha kiwon kiwon ki bynta wa emkaam heipor wa biang wa smat, wei ki paidbah leh suk bha ki u lai emkaam cha ka.
Hawa pyn-eh-daw ya kani ka Bank yow nang ku ko naki por chaki por, kyntu haroh u ya kiwa kreh wow yaleh ki u pynneh yei akor wa bha i wow pynsñiawsuk ya ki paidbah wa wan emkaam.
Heijooh i por khut u i yakrehlang nadooh kiwa kreh kani ka Bank, ki paidbah khnang yow man i yoh myntoilang.
Ha kani ka sngi u kongsan, u Thombor Shiwat da pynlait paidbah u leh ya ka Souvenir yong i lehkmen dap 50 snem ka Bank, da ah u ya u Cake, da khang u ya ka pyrda lehkmen wei pynbna u leh wa ya kani ka lehkmen Golden Jubilee da pynkut ha kani ka sngi.
Da pynphooh pynphieñ ya kani ka lehkmen da i rwai i chaad.
Discussion about this post