Ka Lumbhahdakha Sports Club Wahiajer da pynman ko yaka Sports Week kawa ar kawa sdang nadooh ka 22 tarik uni u bnai kawa da pynkut ynnin ka 27 tarik.
Da wan wow pynhaap pyrda ya kani ka lympung deiwa emlang u Lovely Shylla kam u kongsan uwa man leh kam u Asst. Waheh Chnong, u Dr. J.C. Rymbai, Dr. S.K. Shylla wa ki waheh yong ka chnong u Andrew Sari, Secretary Chnong Wahiajer, u E.S. Kharngi, Secretary Dong, u Salonki Dhar Chairman Dong wa kiwi tawon ki waheh.
Hei klam yong u Secretary yong ka LSSECC u Winstone Mukhim, da ong u wa ka phang wa hakhmat tam yong kani ka Sport Week toh yow wanrah yei suk, i maya wa i yatylli.
Da saam leh ya ki khusnaam cha kiwa chimbynta haka Sports Week wei ya kani ka yalang kawa tbian da pynlai da u Chairman yong ka Sports Club, u Batskhem Sumer. Heijooh i por ka Lumbhahdakha Sports Club da e khublei ko ya ki khon khynroo khyllood, ki manbei manpa, ki khynnah yong ka Dong Lumbhahdakha Wahiajer waroh kamjooh leh ya ka chnong Wahiajer waroh kawi.
