Shillong: Ka Meghalaya Football Association ynne ka sngi da pynkut ko yei lehkmen ka Asian Football Confederation (AFC) Grassroots Day ha Third Ground, Polo, Shillong, heiwa da wan chimbynta palat 200 ngut ki khynnah wa ki waheh kiwa chimbynta ha ki yalehke wa boon jait.
Ka AFC jooh lehkmen ko chisien chi snem yaka Grassroots Day haka 15 tarik uni u bnai deiwa thmu wow pynchlur yei chimbynta haka yalehke bol ha ki waroh ki bytna deiwa chongchit kamjooh yow pyntipmit yaka yalehke bol cha kiwa ym pu jooh myllien yaka.
Heiyatoh wa ini, ka Meghalaya Football Association da lehkmen ko yaka AFC Grassroots Day kawa sdang haka 11 tarik uni u bnai da ki yalehbol ki kynthai wei ynne ka sngi won da chimbynta da ki Veteran, kiwa yalehbol wa duna heibor khmat wa ki khynnah (chynrang wa kynthai).
Da sdang daka Veterans’ Football Tournament hei step wei da pynbood da ka yalehke hapyrdi ka liang kiwa jied yonglang kiwa yalehke Veteran pyrchah yaka liang ka Bethany Society heiwa kiwa yalehke yong ka man ki kiwa duna heibor i khmat. Ha kani ka yalehke waroh da tymmoh ya ki khmat yong ki lait noh ya kiwa yang kool heiwa ka Bethany Society da jop ko da 3-0. Ya kani ka yalehke da wan pait leh da u Anju Turambekar, u All India Football Federation Head of Grassroots.
“Hadien wa yalehke deiwa chah tymmoh i khmat u sñiawthooh phi hadooh katwon i sap yong kiwa yalehke ka Bethany Society. Da man ko kawa sah kynmoo wa i burom wow yoh u yalehke pyrchah ya ki,” da ong u Wanshan Kharkrang, uwa yalehke Veteran kamjooh u Treasurer ka MFA hadien wa kut ka yalehke.
Neiliang u Turambekar da e khublei u ya kiwa yalehke ka Bethany Society wei da pyn-eh boh eh nasib u ya ki ha ka luti wa lai ki.
Da pynman leh ya ka tamasa yalehbol ya ki 156 ngut ki khynnah kiwa em nadooh 4 hadooh 13 snem i rta deiwa pynyoo ya ki ya i buit yalehke wa kiwi kiwi hei yahluti ki Coach ka MFA, ki Referee wa kiwi kiwi.
Discussion about this post