Ka School Managing Committee yong ka St. Michael & All Angels Secondary School, Jowai ha ka 30 tarik da pynkut ko ya ka lehkmen dap 25 snem nae Silver Jubilee Celebration hei wan sakhilang u Paia Da O hi Lhuid, Executive Engineer, PWD Building, West Jaiñtia Hills kam u kongsan najrong ki waheh ka Balang, ki manbei manpa, kiwa sikai wa ki khynnah skur.
Ha ka yalang da kdar yahkhmat da i puræ ya ki kyntien na ka Bible da u Rev. L. Khongthohrem, i klam pdiang burom na u Rev. Dn. N.W. Lyngdoh, i khanna yei parom wa tbian i lai luti ka skur na u Mewothi Gatphoh, Headmaster, i kyntien khublei na ka Emidaka Paslein, Asst. Teacher katwa u Rev. K. Dhar chwa wow poi ka bynta pynkut da booh u ki kyntien duwai.
Iwa kyrpang chooh leh ha kani ka sngi toh i pynkup burom ya ki 2 ngut kiwa sikai ha u snem wa sdang ya ka skur wa kamjooh leh ya ka khynnah skur wa nyngkong dooh wow yaleh ya ka SSLC Examination ha u snem 2011.
Ka Dr. Harshada Lamin, MBBS MS/MD Obst & Gyne kam kawi na ki khynah skur wa nyngkong hei klam da pynsñiaw ko i sñaiwngooh wa khroo ya kiwa pynlai ka skur kamjooh ya kiwa sikai kiwa da yoh ko chiboon i sikai wa miat wa bha wei kitbok kitrwiang ko leh yow nang ku chooh ka skur chakhmat na ki snem cha ki snem.
U Paia Da O hi Lhuid hei e kyntien kam u kongsan da ong u wa i lai luti wow kynjoh ka skur cha uni u moomær wa 25 tylli ki snem toh wa em ka i yakrehlang. Kamtæ da kitbok kitrwiang u leh ya ka skur wa ha ki snem wa chakhmat u man chooh ko ka chlem e sikai kawa ye u sai u pynmih chiboon ki khynnah kiwa ye u rah naam rah burom ya ka skur ha ki liang waphær.
Kam ka dak wow pynsahkynmoo ya kani snem lehkmen, u Paia Da O hi Lhuid da pynlait paidbah u leh ya ka Silver Jubilee Souvenir.
Chooh chooh ya kani ka sngi da pynphooh pynphieñ wei pynwyrngia ya kiwa wan sakhi da ki chaad, ki rwai wa da chimbynta da ki khynnah skur wa kiwa sikai.
Discussion about this post