Uwi u bru wa 28 snem da pynkut u yei mynsien deiwa noh na Balcony ka mala wa 41 yong i yung Supernova Building wa em ha Sector 94, Noida wei ini da jia i ha ka 3 tarik uni u bnai.
Ya uni u bru da tip kam u Sambhav Jain, uwa sah ha Tower A, IMT View CGHS, GH-52, Manesar, Sector 1, IMT Manesar, Haryana.
Chwa ini da em ki bru wa kreh heini yow pynchna AC kiwa da pyrchang wow yarap ya u Sambhav hadien wa yoo wa ksoh u ya ka Railing heiwa da khana u ya ki wa khia i thij i pyrkhat u chwa wow noh u chapoh.
Ki pulit da ong ki wa da wan sah u chi sngi ha i kamra Airbnb kani ka Supernova Building wei da mih u na yung kamwa le sngi chwa heiwa da sah u ha kiwi ki Hotel chwa wow sah heini.
Hawa takit ya kiwa em hajan da ong wa u Sambhav da khia i thij i pyrkhat u wei da pyntip leh cha kiwa ha-yung u yeiwa jia.
Hei takit wa ki pulit da chem wa u Sambhav da yaklam u wa u pa u ha WhatsApp heiwa da khana u wa daw pynkut u yei mynsien heiwa u pa u da kyrpaad u ya oo wym toh u leh yeni.
U Sambhav da bia u ha u snem 2024 wei da yoh u yei khon wa kha deiwa duna bnai ha u 2025 heiwa da man i iwa chitom bha hadooh wa da hap pynlut da kamwa Rs. 40 lak yow sumaar tangwa ym chait i.
Hadien ini da pynlait noh u ya ka kurim deiwa lai cha ka yung bichaar wei da em ki khubor ki wym pu ye u pyntikna wa ong wa ka kurim u da paan ko Rs. 3 klur kam ka bai pynlait heiwa da su u Rs. 1 klur wei da dawa na oo wow su smat ya kawa dang sah.
Discussion about this post