Jowai: Ka Dorbar Chnong Sonapyrdi, Elaka Narpuh East Jaintia Hills District ha ka 22 tarik haka dorbar ka chnong da pyllait paidbah ko ya ka Riti Krehkaam (Constitution) yong ka chnong Sonapyrdi.
Ya kani ka Constitution yong ka chnong Sonapyrdi (Second Amendment 2019) da pyllait paidbah ya ka da u waheh chnong warim ka chnong u Pirit Talang hei emlang kiwa kitkaam chnong nadooh u waheh chnong, Secretary chnong wa ki dkhot ka Executive Committee kamjooh kiwa chong chnong waroh.
U Pirit Talang hawa e yei klam yong oo da ong u wa kiwa chong chnong waroh toh u bood ki ya kani ka Riti Krehkaam ka chnong wei emkaam wow ya krehlang wa kiwa yahkhmat ya ka chnong khnang wa i pynkrehkaam ya kani ka Constitution u man ko kawa jop wei u man ko leh kawa suk wow pynlai ya ki rukom krehkaaam yong ka chnong deiwa khooid kawa bood ryntih ya ka Riti Krehkaam yong ka chnong.
Ka chnong Sonapyrdi da em ko ka yong ka hi ka Riti Krehkaam Synchaar chnong nadooh u snem 2001 wei da pynthymme (Amendment) ya ka katkam i lai wa kylla ka por ha uni u snem.
Ye wow ong wa ka chnong Sonapyrdi toh kawa nyngkong dooh hapoh ka Elaka Narpuh kawa em yaka Riti Krehkaam (Constitution) wow pynlai chnong.
Ha kani ka Second Amendment wa kynthup lang lyngba ka khyrnit wa 19 da ong wa ‘Khnang wow neh i man kyrpang ka chnong ka thaw, yow skem ka Riti Dustur Khasi (Khynriam, Pnar, Bhoi, War) yong i, ka chnong da mana wei maham wa ym chah wow yapoi kha wa ki baar jylla (Non Tribal) wei lada chem wa leh kamni, daw toh ki ha i pynchitom deiwa chah kyntait ya ki na ka imlang ka sahlang, wei daw dooh ki leh ya ki laad yarap na ka chnong.
Kani toh katkam ka kyrwoh wa phah da u Daiapherbha Lamare, Secretary chnong Sonapyrdi.
Discussion about this post