Shillong: Neiliang ka CoMSO da pynkynmoo ko ya ka sorkar Meghalaya wa lada kammon kammon ha uni u Naichiphaw ka sorkar toh u wanrah ko ya ka ILP ha ka jylla Meghalaya wei toh u leh ko yeiwa emkaam kamwa da kular wow pynpsiah ya ki kyndon ka ILP ha ka Meghalaya Residential Safety and Security Act (MRSSA).
Ka CoMSO da ong ko wa man ko kawa da pynkhreh wow krehlang wa ka sorkar wow pynbait pynjanai ya ki kyndon kammon wow pynkrehkaam ya ka ILP ha ka Jylla wei da man ko leh kawa da pynkhreh wow yakhih lada ka sokar dang boohteiñ ko ya ini i kaam.
Ha kini ki kajiak sngi neiliang ka CoMSO da yachem ko leh ya ki montri, ki heh yong ki seiñ wa em hapoh ka sokar kamjooh leh ki MLA kiwa em ha ka liang pyrchah.
“Emkaam jhan ya ka ILP khamtam hadien wa ka Assam dadep pynbna ko ya ka thup wa pura ha ka NRC wei ha u Kmaichonglad i por daw kut noh i wow elaad ya kiwa sahwiar wow yasait ki neibynta yong ki hi wei khamtaam hadien wa ka sorkar pyrdi da rai kut ko wow wanrah ya ka CAB”, da ong ka CoMSO.
Neiliang u Amit Shah hadien wa wan u ha Mizoram da klam che u wa ha ki le tylli ki jylla wa em ka ILP daw booh ya ki kyndon wa kyrpang ha ka CAB wow lait nei wan psiah tooh ki baar ri, heiyatoh wa ini ka CoMSO da ong ko wa ini pynyoo i wa lada ki jylla ym kwah ki wow krehkaam ka CAB emkaam wow pynkrehkaam noh da ka ILP.
Ka jylla Manipur da pdiang ko ya ka Manipur People Protection Bill 2018, ka Assam hajrong ka NRC dang pynkreh ko wow yaklam lyngba ka High Level Committee hajrong ka Clause 6 yong ka Assam Accord kammon wow yada ya ki tre ri wei wot ki tre chnong ka Tripura dang chit i dawa ya ka Twipraland (ka jylla ki bru ri-loom) yong ka hi. Kini ki jylla pynyoo ki wa kwah ki wow yada ya ki bru ri-loom katwa ka Meghalaya man i mar deiwa yoo.
Kamtæ ka CoMSO da ong ko wa lada ka sorkar pyrchah ko ya ka CAB toh u pynkrehkaam noh ko ya ka ILP neibhah ka CAB wei i pynkrehkaam ya ka ILP mih i na i jooh hi wow yada ya ki tre ri tre muluk.
Discussion about this post