Ka Seiñ Raij Mukhla hapoh i yahkhmat u Pa Langdoh Niam chirup deilang wa ki Waheh Sankur “Kur Lyngdoh, Shylla, Suna, War, Sari” da pynman ki yei pynkyntang ya u Maji Niam ka Raij Mukhla ynne ka sngi ha Yung Langdoh Yung Blai ya u khynroo Firstly Sari.
Ya ini i pynkyntang Maji thymme da leh hadien wa da ieh kaam u Maji Niam warim ka Seiñ Raij Mukhla, kamtæ ka Dorbar Sankur ryngkat wa i mon i khai yong u Blai da jied ki ya u Firstly Sari kam u Maji Niam thymme deiwa pyndep yei leh niam pynkyntang Maji Niam hakhmat u klong u skoo, i pyrnah i pyrjin, ka pliang ka naar wa u tylli u kyntien.
Ya kani ka kaam Maji Niam toh ka kaam kawa hap u Maji u chakri yaka niam ka rukom ha chi lynter ki sngi wa im u katwa dang ye u kreh ya ini i kaam niam.
Ha kani ka sngi pynkyntang ya u Maji Niam ka Seiñ Raij Mukhla da wan ya sakhilang da u Pa Daloi ka Elaka Nangbah, u RM Garod chirup wa u Pator ka Raij Mukhla, u Wh. Dibormi Thubru, wei ha kani ka sngi da wan wow ya chimbynta lang da ki khon khynroo ka Seiñ Raij Mukhla wa kamjooh ki manbei.
Hadien wa pyndep ya ka leh niam ha pchem yung ka Bei Langdoh da ka Niam Suit Niam Choor da u syiñ, ka dakha wa i pyrnah i pyrjin, tæ ka Bei Langdoh Niam ka Seiñ Raij Mukhla da pynkham ko ya u Maji Niam wa thymme ka Seiñ Raij Mukhla da u Tylli u Kuchi kam ka dak wa da e bor ya u Maji Niam wa da ye u sdang u chimbynta u pyndep yei leh niam leh rukom hapoh ka Seiñ Raij Mukhla.
Kani toh katkam i pynlait khubor u Wh. Standbyme Sari, uwa man u Waheh Sari na ki Waheh Sankur wa mihkhmat ya ka kur Sari.
