Jowai: Ka Chaad Niam Behdieñkhlam toh kawi na ki Chaad Niam wa bna naam yong ka Bri u Ñiawtrep Ñiawskum kawa da leh hajrong ka yurim i sikai Niam wow pynkhroo yei burom U Trekirot wa lailang chirup ki lehniam wei Chaad i kmen nadooh na Raij hadooh ha yung ha sem.
Katwa ki sngi yong ka Chaad Niam Behdieñkhlam næ kitæ ki ‘Soo Sngi Le Yaw’ yong U Trekirot da poi ki, yoosuk u chem wa ha kam ini i por kawi ka manyung wa em ha dong Loomkyrwiang dei sñiawkhia da chim ko wow pynkyrpang yei man ka Chaad Niam Behdieñkhlam yong uni u snem deiwa biah ya ki dur næ ki Poster ha chilynter ka kynroh yung.
Boodien u sakhi yeini i johkhe kani ka manyung u leh kaini i kaam dachem wa man sakhiat i rukom leh wa em yumut heiwa ki dur wa dabiah ha chilynter yong ka kynroh man sakhiat ki dur wa pynyoo ya ki rukom lehniam waphær heiyatoh waka Behdieñkhlam kiwa da thoh leh ya ki kyntien chon yumut wei ini i leh da e myntoi i ya ki lok ki jor walai wa wan na kani ka thaw deiwa pait wei puræ ya ki kyntien wa thoh ha kini ki dur.
Ki dur kiwa da pynyoo ha i kynroh kani ka manyung toh kiwa klam khana yei man kyrpang ki sngi wakhroo u Trekirot, yei burom ka Bon, ka Tein, ka Wet, ka Doh kiwa man ki Soo ngut ki Khon Puri Blai wa seiñ yei Chnong Jwai, yei burom ki Soodwar Sooluti waman ki Blai Chnong Blai Raij, yei burom U Khroo Yutang- U Ksan Dorbar Jop Dorbar wei burom ki Sangia-Saret.
Hei yaklam wa uwi na ki waheh kani ka manyung da Khana ki wa da leh yeini dei sñiawkhia yei man kyrpang yong ka Chaad Niam Behdieñkhlam ha uni u snem wot hapyrdi i khoom i kdoh ki aiñ sorkar wym yoh de u ya mih ya lai kamwa jooh. Hajrong kini kiyi ki tynjooh da pynman wow leh yeini kawa man chibynta leh ka dak i pynphooh pynphieñ ya ka Chaad Behdieñkhlam.
Chooh chooh ha ka Sngi Pynsiñ kani ka manyung dei sñiawkhia wow pynpsiah yei tip Niam hapyrdi ki Khon ka Yung ka sem da pynmih ko leh ya ka puran puthi wa e pyrtuid “Ka Nia Ka Yutang Hei Ngooh I Dem”.
