Ka India da ong ko wa da em palat 100 ngut ki Terrorist wa yap ha ka Operation Sindoor wei da siat leh ya ki 9 tylli ki thaw wa rieh wa ki thaw wa pynemkaam ki.
Heiyatoh wa ini, ka India da pynlait ko yei pyrtuid ki heh chipai ka Pakistani kiwa da lai tlep ya kini ki Terrorist wa yap ha ka Operation Sindoor, kawa da sdang ha ka 7 tarik.
Hapoh ka Operation Sindoor, ka India da siat ko ya 9 tylli kini ki ktem Markaz Taiba yong ka Lashkar-e-Taiba (LeT) ha Muridke, ka Markaz Subhan Allah ka Jaish-e-Mohammad (JeM) ha Bahawalpur wa ka Mehmoona Joya Facility ka Hizbul Mujahideen wa em ha Sialkot.
Katkam wa ong ki heh chipai ka India, ya ka yalang leh niam chwa wow tlep ya ki Terrorist wa yap da yahkhmat da u Abdul Rauf uwa man kam u Commander ka LeT wei uwa da tipmit da ka USA kam u Global Terrorist.
Kamtæ da ong wa ini pynyoo ko yei ya krehlang ki chipai ka Pakistani wa kini ki Terrorist, heiwa da emlang ha kani ka yalang lai tlep wa u Lt. Gen. Fayyaz Hussain Shah, u Major General Rao Imran Sartaj wa u Brigadier Mohd Furqan Shabbir.
Da emlang leh wot ki heh pulit ka Pakistan kam u Usman Anwar wa uwi u Politician uwa tip kam u Malik Sohaib Ahmed kiwa da wan wow duwai neibynta kini kiwa yap.
Ya kani ka yalang yap bru da leh ka dei burom ka sorkar heiwa ya ki synduk yong ki Terrorist da tymmoh ki da ka lama Pakistan.
Na ki 100 ngut ki Terrorist wa yap, da em leh ki heh kam u Khalid uwa tip leh kam u Abu Akasha uwa man kam u dkhot ka Lashkar-e-Taiba kawa krehkaam ha Jammu & Kashmir. Wei man u leh kam uwa emkti wow wanrah tiar yasiat na Afghanistan cha Pakistan deiwa em u ha Peshawar.
Sa uwi u heh toh u Mudassir Khadian Khas uwa jooh pynemkaam yei pyrtuid kam u Mudassar wa Abu Jundal uwa man leh u bru ka Lashkar wei da pynlai u ya ka Muridke Terrorist Camp. Wei kani ka Camp toh kawa chah sikai u Ajmal Kasab uwa man kam u Terrorist wa chah kem uwa wan siat ya ka Mumbai ha u snem 2008 deilang wa u David Headley uwa emkti wow pynkhreh yeiwa leh ki ha Mumbai.
Kiwi de kiwa da yap toh u Mohammad Hassan Khan, u dkhot ka Jaish-e-Mohammad, uwa man u khon u Mufti Asghar Khan Kashmiri, wei kini toh kiwa leh ya ki kaam damok ha Pakistan-occupied Kashmir (PoK), wei da jooh krehkaam u na ka Syedna Bilal Terrorist Camp deilang wa u Mufti Asghar wa u Ashiq Negroo kiwa man ki dkhot ka JeM kiwa emkti yeiwa jia ha Pulwama ha u 2019.
U Yusuf Azhar, u Abdul Malik Rauf wa u Mudasir Ahmed toh kiwa emkti ha i Hijacking yong ka IC-814 ha u 1999 wa iwa jia ha Pulwama ha u 2019 wei kini toh kiwa da yap ha ka 7 tarik wa sdang ya ka Operation Sindoor.
Discussion about this post