Ka Mowkaiaw CYC da jop ko ya ka ka Moodymmai SC da 36 Run ha ka yalehke ynne ka sngi yong ka District Cricket League 2025 wa pynlai da ka West Jaiñtia Hills District Cricket Association.
Ka yalehke da hap wow pynduna cha ka 10 Over chiliang neidaw wa em i pynthut u slap nadooh i por step. Ya ka kylla khlem da jop da ka Mowkaiaw kawa da jied wow Bat nyngkong wei da kamai ko 88/5 na ki 10 Over. U Sanvert B Kurkalang da yoh u 33 Run na ki 23 bol deilang wa 5 tylli ki 4 Run, u Ardakirang Rymbai won da yoh u 29 Run (Not Out) na ki 13 bol deilang kawi ka 6 Run wa 4 tylli ki 4 Run. U Pyndap Lamin, uwa kawang bol yong ka Moodymmai da yoh u pynhaap 2 Wicket na ki 2 Over.
Ka Moodymmai hawa beh ya ka thong da yoh ko du 52 Run na ki 10 Over deiwa dooh ar Wicket. U Levestar Phawa (C) da man u du oo samen uwa lehbha deiwa kamai 24 Run (Not Out) na ki 31 bol deiwa dat leh 2 tylli ki 6 Run. U Kitboklang Lyngdoh wa u Sandabiang Lathong kiwa kawang bol yong ka Mowkaiaw da yoh ki u pynhaap mar chi Wicket na ki 2 Over. U Sanvert B Kurkalang yong ka Mowkaiaw uwa lehbha da ka Bat da yoh u yei naam Man of the Match.
Deiwa yoh yei jop ynne, ka Mowkaiaw da em ko hei wa ar hei boon Point ka Pool B deiwa jop soo sien, rem chisien wei ya drawn chisien na 6 tylli ki yalehke yow yoh 9 Point. Ka Moodymmai SC won ym em jop ko tang chisien leh wei da ya drawn ko ar sien na ki 6 tylli ki yalehke wei da em ko hei khaddooh i boon Point ka Pool B.
Ka Mowkaiaw CYC hap yang ko ya ka yalehke mynstep yow tip ko wa daw yoh ko u psiah cha ka Semi Final næ ym yoh.
Ka yalehke mynstep toh ka yalehke wa khaddooh ka League Stage, wei u man ko hapyrdi ka Phramer CC pyrchah ya ka Young Lad’s CC heipor 8:30 i step.
Ya ka Digital Live Score yong kani ka League ye phi u pait ha https://cricheroes.com/tournament/1406553/wjhdca-district-cricket-league-2025.
Discussion about this post