Ka jhaad yaleh thma ka Indian Navy wa tip kam ka Indian Naval Ship Sumitra, hadien wa pynlait ko yaka lieñ khwe (Fishing Vehicle) wa tip kam ka FV Iman ha ka 28 tarik, ynnin ka 29 tarik da ye won ko u pynlait sa ya ka lieñ khwe FV Al Naeemi.
Ha ka Fishing Vessel Al Naeemi em 19 ngut kiwa khwe ka Pakistan kiwa da chah rahbor ha ki 11 ngut ki damok duriaw namo ki Pirate wa rah suloi kiwa na Somalia ha thaaiñ mihsngi ka Somalia ha duriaw Arabian Sea.
Ka INS Sumitra, toh kawa da phah wow yakhun pyrchah ya ki damok duriaw namo ka Anti-Piracy and Maritime Security Operations East ha Gulf of Aden waka Arabian Sea.
Ynnin i step kini ki damok da ksohbor (Hostage) ki ya ki 19 ngut kiwa khwe na Pakistan wei mar ya tip yeini ka INS Sumitra da thooh wei da booddien ko yaka FV Al Naeemi.
Mar ya chem ya kani ka lieñ khwe, ka INS Sumitra da pynhær ko yaka lieñsuiñ niangkachiah (Helicopter) HAL Dhruv wei da pynhiar ya ki lieñ khian chirup wa ki chipai kiwa tia cha kani ka lieñ khwe heiwa da randien wei da pyndem noh kini ki damok. Ki chipai da ku ki leh ha kani ka lieñ wow pyntikna wa waroh ki 19 ngut wa chah ksoh man ki kiwa chait wei da kem noh ya kini ki Pirates.
Ka INS Sumitra du hapoh 36 kynta da ye ko wow pynlait ya ar tylli ki lieñ khwe dakha wa 36 ngut kiwa kynthup ya 17 ngut na Iran kiwa em ha ka FV Iman wa 19 ngut kiwa na Pakistan kiwa em ha ka Al Naeemi
Ka Indian Navy da pynyoo ko ya i dak wow pynneh ya i suk ha ki duriaw khamtam na kti ki damok.
Discussion about this post