Ka High Court ka Meghalaya ha ka 16 tarik uni u bnai da pynlait ko ya u bru wa tip kam u Thombor Shadap uwa da rai pynrem da ka yung bichaar u Sessions Judge/Addl.DC(J), East Jaiñtia Hills District, Khliehriat ha ka 30-03-23 heiwa da phah kset oo waroh chirta deiwa pynchitom bha deilang wa ka kuna kawa Rs. 10,000.
U Thombor toh uwa da chah pynbaad wa tynyap u ya u Shawas Phyrngap ha i thaw wa tip kam i Briwar wa dang haap hapoh ka Elaka Nongkhlieh.
Hawa takit ki pulit da kem ki ya u Thombor deilang wa uwi uwa tip kam u Nidamon Chullet kiwa da phla wa neidaw wa muaid ki da ya kajai ki wa u Shawas tangwa da tip ki wa da yap noh u du ha ka sngi wa bood.
Ya ka FIR da e da ka kurim uwa da khlaad ha ka 31-12-11 hadien ar sngi wa em wa pyntip cha ka wa chah tynyap u kurim ko ha ka 29-12-11 tangwa ki pulit da lai chim lai thoh ki yeiwa khana kiwa sakhi hadien ar bnai ha ka 02-03-12 heiwa u muktiar u Thombor da yasaaid u wa kiwa sakhi hadien wa slem ym ye de ki wow kynmoo thij kamwa jia.
Chooh chooh da yasaaid wa wot ka kurim uwa khlaad leh ym tip ko uyi wa tynyap ya u kurim ko nyngkong tangwa hadien won da kylla ktien ko deiwi deiwa ong wa toh u Thombor wa leh yeini khlem da ye ko wow pynsakhiat.
Katkam wa chem ki Doctor wa leh Post-Mortem da ong wa da yap uni u bru deiwa em wa dat oo boonsien da i tiar wa nep.
Ka yung bichaar da ong ko wa hanla em kiwa sakhi ya ini wa jia tangwa da lai wow pynlang pynlum yeiwa ong ki hadien palat ar bnai wot hawa da ye leh wow wanrah 11 ngut kam kiwa sakhi ya ini wa jia hawa pynkhreh Case da ki pulit.
Uwi na kiwa sakhi da ong u hawa pynche Torchlight u da yoo u ya u Thom wa yachoh u wa u Shawas wei tipmit u ya u Thom kamjooh ya u Chawas.
Katkam wa ong u, ha katu ka miet heipor 9:00 waje da em u ha kani ka yaaw wa em ha Briwar wei da yachem u wa u Chawas chwa wow chah dat chah tynyap u wei da yaklam u leh wa oo chwa wow lai u yei yong oo hi i kaam. Hadien kattu katni por da sñiaw u yeiwa ong ki bru wa em uwi u bru wa chah dat wei oo deilang wa uwi da lai ki cha ini i thaw wei da yoo wa da thiah yapler u Chawas ha khyndaw wei da mih snaam i dur i dar wei da yoo u leh ya u Thom uwa dang dat ya uni u bru wei kani ka yaaw ha Briwar da mantre da u Thom hi uwa na Shangpung.
Da ong u leh wa neidaw wa uwa yap toh na ka jooh ka chnong wa oo, da lai u wow pyntip cha ka yung ka sem u wei da wan ki cha ini i thaw wa jia tangwa ym em de chem yei metyap wei da liwan biang ki cha chnong ki ha Shnongrim. Ha ka sngi wa bood ha ka 30-12-11 ki chynrang ka chnong da lai thooh biang ki oo wei heipor kamwa chi waje ar waje da chem yei metyap u na iwi i thaw wei da kit ya oo cha yung. Kamtæ ha ka 31 tarik da e FIR wei ki pulit da wan ki wow leh Post-Mortem ha yung.
Uwi won uwa sakhi da ong u wa ym ye de u wow kynmoo yeiwa jia ha katu ka miet deiwa ong wa tip donhi u wa em wa yap tangwa ym em yoo u uyi wa emkti. Tangwa nyngkong da ong u wa da yoo u ya u Chawas wa thiah yap u ha khyndaw wei da mih snaam i dur i dar u wei da yoo u leh ya u Thom wa dat u oo.
Ka yung bichaar won da ong ko wa ym em chem leh ya i tiar wa pynemkaam yow tynyap ya uni u bru wei ym em leh wanrah ya ka Torchlight wa pynemkaam yow chynna ya uni uwa tynyap bru weiwa slem hi leh ki pulit wow leh yei kaam iwa da pynman ya ka High Court wow artatien ko wot hadooh ya iwa da khana da kiwa sakhi yeiwa jia khamtam hadien wa da em uwi uwa da kylla ktien.
Kamtæ da rai wow pyndam noh ya ka hukum rai pynrem wei phah kset ya u Thombor wei kawon kawon kawa phah su ya oo wow pynuiñ noh ka.
Discussion about this post