Ka TATA Motors ha ka 17 tarik uni u bnai lyngba ka dukan dai kari wa tip kam ka Frank Motors wa em ha Marian Hill, Jowai da pynlait paidbah ko yaka kari wa pynemkaam dei bordiñ namo ka Electric Vehicle (EV) wa thymme wa tip kam ka TATA Punch EV haka yalang wa tbian wa da pynman ha kani hi ka dukan.
Ha kani ka pynlait paidbah da wan sakhilang ki bru napoh ka Mahindra Finance, ka Chola Finance, neitæ ki Branch Manager na ki Bank waphær waphær wa ki bru wa chaniah kari naka TATA.
Neiliang u Sales Manager ka Frank Motors, u Graham R Pajat hawa e yei klam da ong u, ya ki kari Electric wot ka sorkar India leh da yalehbha ko u pynchlur ya ki bru wow pynemkaam ki khamtam wa toh ka ri wa da joor i boon bru, wei nadooh u snem 2030 daw pynduna bha i pynmih yaki kari wa pynemkaam dei phñiang.
I myntoi kani ka kari Electric toh wa duna bha i lut i sep neibynta wow pyntoh pyntne yei emkaam ko lada wyrchaw wa ki kari wa pynemkaam dei Petrol næ Diesel wei man ko leh ka kari wym em Engine, wei i lut neibynta u pyndap bordiñ ya u Battery leh duna bha.
Yow pyndap Battery emkaam du kamwa 35 Unit i bordiñ, neitæ lada lai ko haka chi bnai 1200 Km i lut toh Rs. 1300 donhi, lada lai won da ki kari wa pynemkam dei Petrol hadooh 1200 Km ha chi bnai ye u lut Rs. 8,000 hadooh Rs. 10,000 chi bnai. Iwa mut daka kari Electric da yoh u pynlang Rs. 8,000 hadooh Rs. 9,000.
Pyntip haroh u wa wot neiliang ka sorkar Meghalaya leh e Subsidy ko kamjooh ka Registration dei mynkna ya ki bru wa thied kam kini ki kari lyngba ka Policy wa da wanrah ko ha u snem 2021, wei kani ka Policy u kut ko hadooh u snem 2025 neibynta ki kari wa chongdor hapoh Rs. 15 lak heiwa ka Subsidy man ko Rs. 60,000 kawa daw e da ka sorkar.
Kiwa ye u yoh ya ki Subsidy wei ka bai Registration dei mynkna toh hadooh 2500 tylli ki kari Electric wei manda palat won yaka 2500 tylli i lai yaaw kini ki kari, ki paidbah ym yoh Subsidy de ki, na ini i daw kyntu u ya ki paidbah wow smat wan thied ki katwa dang yoh ya kani ka kabu.
Kamwa man katni kani ka kari lada thied da kawa duna dor dooh ye ko u lai chisien Charge yei Battery toh 315 Km heiwa kani da biang ware ko neibynta u pynemkaam man-ka-sngi, neitæ kiwa rap sy’at dor nadooh Mid-Range hadooh wa sy’at dooh ye ko u lai 421 Km iwa da pahooh u lai u wan Shillong-Guwahati.
Kini ki kari TATA Punch EV toh kiwa ye u Charge hi ya u Battery heipor wa yah itæ heipor wa pynoh riat, heipor wym em yooh Accelerator wei heipor wa yooh Brake.
Yow ye won u lai rap jngai ye wow pynemkaam da ka Eco Mode.
I dor wa sdang dai ya kani ka kari toh Rs. 10,99,000.
Discussion about this post