I yakhun pyrchah ya i drugs ha kylleiñ ka thaaiñ chaneiñ mihsngi dang joor i kat dang mih ki sngi tangwa ha iwi i jia wa pynkhyrngiat ya kiwa boon heiwa 5 ngut ki pulit ka Manipur chirup wa uwi u sahep da chah pynchitom ki deiwa chah beh kreh chipor (Suspend) hadien wa emkti ki ha i kaam khayi drugs.
Kini ki pulit toh u Inspector Ningthoujam Devdas Singh, u Sub-Inspector B. Debson Singh, u Constable Tarique Aziz, u Head Constable Md. Rakib wa u Jemadar Md. Amin Shah.
U Sub-Inspector Debson toh uwa dadep chah kem chisien ha u snem 2013 hadien wa chah pynbaad u wa kit u ya ki Pseudoephedrine Tablet wa chongdor hadooh Rs. 3 klur cha chnong Moreh iwa man i chnong khappood ka Tengnoupal District. Wei hadien ini da chah pyndam leh ya ka Chief Minister’s Gallantry Award kawa da e cha oo.
Ha u bnai nyngkong uni u snem da em leh uwi u Rifleman ka 1st Manipur Rifles uwa em hapoh ka Special Branch ka CID uwa da chah kem deilang wa 10.2 kg i Methamphetamine Tablet ha Kakching District.
U DGP ka Manipur, u Rajiv Singh da pyntikna u yeini deiwa ong wa kini ki 5 ngut ki pulit da emkti ki ha i yoh kem drugs ha ka 5 tarik uni u bnai heiwa da yoh ya kiwa khayi drugs ha u sarokbah NH-102 ha khappood India wa Myanmar chirup wa i drugs tangwa da pynlait noh ya ki hadien wa su ki Rs. 6 lak ya kini ki pulit.
U Rajiv Singh da ong u wa i drugs da ktah bha i ym du ya ka Manipur tangwa ya ki jylla ka thaaiñ waroh kawi wei waroh da emkti ki wow yakhun yeini.
Da ong u wa da pynkhor bha ki hawa kreh pyrchah ya i drugs lada emkti ki bru paidbah namo ki pulit neibhah wa daw ktah ko ya ka mynried wa ka pateiñ.
Neiliang ki pulit dang takit ki lada dang em chooh kiwi ki pulit kiwa emkti ha ini i kaam.
Discussion about this post