Ynne ka sngi ka 15 tarik u MLA ka Raliang Constituency, u Comingone Ymbon da pynlait paidbah u ya ka kot wa e pyrtuid “Kaei ka Seiñ Raij…?” wa da thoh da u Hamjhan H Dkhar wei heijooh i por da pynlait u leh ya ka Calendar 2022 ka Seiñ Raij Raliang.
Chwa wow pynlait ya kini ki kot da em ka yalang wa tbian ha yung ka Seiñ Raij Raliang, West Jaiñtia Hills wa pynlai da u Binroy Dkhar, President ka seiñ.
Ha ka yalang da yoh leh i klam na u Hamjhan H Dkhar uwa da thoh ya kani ka kot heiwa da ong u wa da emkaam wow pynneh pynsah hei thoh ya kiyi kiwa rim da hikai ki ha ka pateiñ khnang wow lait ka jaitbru u wiar. Da ngait skem u leh wa chiboon i myntoi u yoh na kani ka kot hanla man ko kawa ympu biang lut khamtam hei bood bait bood ryntih ya ki dak wa ki ktien.
Ha kani ka sngi da emlang leh u Dolloi ka Elaka Raliang, u Chawas Lyngdoh, u Pator ka Elaka, u Stephan Dkhar wa kiwi kiwi ki manbei manpa.
Kani leh da man ko ka sien wa nyngkong wa da ye ka Seiñ Raij u pynmih ya ka Calender yong u snem 2022 katkam ki bnai ki sngi yongrim ka Raij ka Elaka Raliang.
Ha kani ka kot u yoh yutip leh chaphang ki kaam wa kreh ka Seiñ Raij weiwa kammon sdang ki ka, kammon man ka chnong ka thaw wa kammon da seiñ chnong ya ka Raliang.
