Ynne ka sngi u Montri sorkar, u Wailadmiki Shylla da pynlait paidbah u ya ka Film Khasi kawa pyrtuid ka “Khatduh” ha Community Hall ka Mukhla Dorbar Pyllun.
Ya kani ka Film da pynwandur da ka Diana Marbaniang wei da pynmih da ka Saindur Production heiwa kiwa ak ha ka kynthup ki ya u Player Suna, u Rangkat Sari, ka Syrpai Sohmat wa ka Lana I Ka Snieh.
Ya ka yalang pynlait ya ka Film da pynlai da u Ryngkat Sari uwa man leh u Actor ka Film, wei da yoh i kyntien ngoohblai na u F. Sari.
Ka Diana Marbaniang hawa e i klam da ong ko wa boon ki laad wow yoh kreh na i chna Film nadooh kiwa thoh parom, kiwa chaad, ki Actor, Actress, Cameraman wa kiwi.
Da ong ko wa hanlada khian ka yaaw wow chna Film tangwa ki khynnah na Khasi Jaiñtia boon kiwa em sap hanlada ym em ki Acting School wa kiwi.
U District Arts and Culture Officer, u W. Gassah hawa e i klam da e u i kyrchaan ya kiwa pynmih ya ka Film neibhah kiwa embynta ha ka toh kiwa chlur wei kiwa embynta bha ha ki kaam imlang sahlang.
U Wailadmiki hawa e i klam da e khublei u ya ka Director wa yahluti ko ya ki khynroo khyllood wow embynta ha kani ka Film.
Da ong u wa kani ka juk toh kawa joor ka yakhun (Competition) wow yaknieh nadooh ki kreh sorkar heiwa ha ka chi snem em kamwa 2,000 ki Post wa mih katwa kiwa pyndep yei puræ em ki 60,000 iwa mut manda thung kreh da em 58,000 ngut kiwa dooh.
Chooh chooh da kdaw u wa boon kiwa em ha ka jylla toh ki khynroo heiwa ka sorkar da pyrkhat ko yeini heiwa da wanrah da ka Film Policy neibynta kiwa chna Film. Da kynmoo u ya ki Film wa ki Music Album wa da pynmih napoh ka Ri-loom Jaiñtia tangwa manda joor ka Piracy wei i mih ka Mobile Phone da hiar ya ka yaaw chna Film.
Da kdaw u wa ha ka Cinema leh da hiar ka yaaw wei katni da mih ki OTT wa ka YouTube, kamtæ kam wow pynchlur ya ki khynroo ka sorkar da sdang ko ya ka Hello Meghalaya heiwa da batai u kammon u pynemkaam ya ka.
Heijooh i por da khana u wa ka sorkar da bhah ko 6 bynta ya kiwa chna Film heiwa ha ka Category wa nyngkong da e ko Rs. 35 lak samen ya kiwa chna Film, ha kiwi ki kyrdan da e ko jar hiar ki kyrdan wa ka poisa ya ki.
Da khana u leh wa ka sorkar pynchlur ko ya kiwa na baar wow wan chna Film heini ka jylla deiwa su poisa ya ki neibhah deiwa wan ki pynku ko ya ki kaam uiñke suwari ha ka jylla neibhah manda yoo ka pyrthai ya ki thaw wa miat daw kwah ki wow wan sakhi ya ki loom ki wah wa i miat ka jylla.
U Wailadmiki Shylla da pynbna u leh wa ka sorkar hapoh ka CM Elevate daw e ko ya ka Subsidy wa 35% ya kiwa chna Cinema Hall heiwa da booh bhah kawi ha Shillong, ha Tura wa ha Jowai tangwa ha Jowai hadooh katni ympu em wa wan chaphrang wow chimkabu ya kani ka Subsidy.
Da kyntu u ya kiwa chna næ pynmih Video wow chna ya ki Video wa em yumut wa em i sneiñ i kroo khamtam wa ka sorkar pynchlur ko wow chna ya ki Documentary næ kiwa em parom.
Kiwi kiwa da klam ha kani ka sngi toh u General Secretary ka Mukhla Pyllun, u H. Suna, u Waheh Chnong ka Mukhla Chohchrieh, u Enforce Suna wei ya ki kyntien khublei da yoh na u Player Suna.
Wow chimwai ya ka Film ye u Phone ha u Number 60090 38374 wa 8731076404.
Discussion about this post