U Montri Rangbah ka jylla, u Conrad K Sangma da pyntip u wa ka sorkar da pynlait poisa ko cha 877 ngut kiwa yaleh neibynta wow yoh ya ka Scheme Homestay wei da em 843 ngut kiwa da yoh ya ka poisa.
Da ong u wa yow yoh ya kani ka Scheme da hap wow lai lyngba ki 3 rtap deiwa sdang na ki District Tourism Officer kiwa bichaar bniah ya ki kot ki sla wa kynthup wa kiwa yatoh wa ki Bank, manda dep ini da lai paitlang leh wa kiwa kreh ki Bank yei thaw wa da thmu wow chna ya ka Homestay, wei hadien won poi cha ka Directorate yow pait yeiwa chem ki District Tourism Officer neitæ won poi cha i pynlait poisa hadien wa da bichaar da ka Committee ha ka kyrdan u Commissioner & Secretary.
Da ong u wa ya kani ka Scheme da e cha ki chnong kiwa em chajan ki thaw uiñke suwari kiwa khlan bha ki Tourist wow wan kam cha ki chnong kiwa em ki kchaaid, ki krem wa kiwi de.
Hachwa wow e jubab yeiwa kylli wa da wanrah da u MLA na Mawryngkneng, u Heavingstone Kharpran, u Montri ka chnat Tourism, u Timothy D Shira da pyntip u wa hachwa wow e ya ka Scheme neibynta wow chna ya ki Homestay, da leh chwa yei thooh bniah wa ka sorjamin wei da e katkam i emkaam ka thaaiñ wa em ki thaw uiñke suwari deiwa bichaar leh yei poi ki bru katkam ki aiom wa kiwi de kiwa emkaam.
U Montri da pyntip u leh wa kani ka Scheme man ko Rs. 10 lak uwi wei na kani da su Rs. 7 lak da ka sorkar jylla kam ka Subsidy wa 10% won hap su chwa wow yoh Scheme wei kawa sah ka 20% hap ki wow su kam ka Instalment.
Discussion about this post