U Kesav Suneesh, uwa man u khynroo na Kandallur, Alappuzha District ka jylla Kerala da pynyoo u wa manda em i mon em bait ka laad hanlada duna ha ka poisa poilaiñ.
Iwa angnood u Kesav toh wow ku ya u Mount Everest, wei dapoi u hadooh ha Everest Base Camp wa jrong hadooh 5,364 metre na sla duriaw.
U Kesav uwa 21 snem da kwah u wow ku ya ki loom Himalaya wei da kreh u ha iwi i dukan dai jhoor ha Kayamkulam.
Dang lai puræ B.Com u ha IHRD College, Karthikappally wei da tip u wa i ku ya u Everest man iwa sy’at heiwa daw hap su u Rs. 50 lak tangwa da booh thong noh u wow poi hadooh ha Base Camp wei da sdang pynlang u hadooh Rs. 35,000 deiwa kreh ha dukan dai jhoor wa i pynpoi baam (Food Delivery).
Chwa wow lai cha Base Camp, u Kesav da sdang u ya ka luti heiwa dapoi u cha 18 tylli ki jylla ka ri deiwa sdang ha u September 2025 tangwa da liwan noh u ha u January 2026 hadien wa khlaad ka beipun u.
Kamtæ da kreh wei da pynlang poisa biang u wow lai cha ki loom Himalaya nadooh ka 7 tarik u April wei wow pynduna yei lut da lai u da ki rel toh dor wei deiwa chong Bus hadooh wa poi Gorakhpur, Uttar Pradesh yow psiah u cha Nepal lyngba u pood Sonauli wow poi ha Salleri heiwa da lai luti u dei kjat.
Hadien 8 sngi u Kesav da lai u 132 Kilometre lyngba ki loom deiwa sah ha i Tent wa rah u kamjooh wow chet baam hi yow pynduna yei lutsan.
Deiwa leh kamni, u Kesav da poi u hadooh ha Everest Base Camp ha ka 20 tarik u April deiwa pynlut du Rs. 16,000.
Yow poi hadooh u khlieh u Mt. Everest ong u wa emkaam wow tip kammon wow ku loom kamjooh ki tiar ki tar wa kyrpang wei chimpor hadooh 35 sngi iwa kattæ ym pu ye u wow leh tangwa da kmen wow poi chwa tang ha ka Base Camp deiwa yooluti wa ha kawi ka sngi daw poi u cha ka thong.
Discussion about this post