Ka Meghalaya Cricket Association da pynman ko ya ka Election jied ya kiwa krehkaam wa da pynman ha Umbir, Ri-Bhoi, ha ka 22 tarik uni u bnai heiwa da jied biang ya u Gideon Kharkongor kam u Honorary Secretary katwa u Naba Bhattacharjee da man biang u kam u President.
Kini ki ar ngut da jop ki khlem em wa leh pyrchah, u Bhattacharjee da jooh man u kam u Honorary Secretary hadooh u 2019 wei hadien ini da chimkti da u Kharkongor.
Ya kiwi de ki kaam da pyndap da u Chiang D Shira kam u Joint Secretary khlem em wa leh pyrchah katwa u Sengnab Momin da chem jied u kam u dkhot thymme Member (Councillor) khlem em wa leh pyrchah.
Da em ar tylli ki kaam wa da em kiwa yaleh kitæ yow man VP wa Treasurer wa da em mar arngut ki kyrtong heiwa da jop u Rayonald Kharkamni kam u VP wa u Dhrubajyoti Thakuria kam u Treasurer.
Ya kani ka Election da leh katkam ki kyndon ka BCCI, da pyntip u Electoral Officer, u W Khyllep deiwa bood leh ya ki kyndon ka Election Commission of India.
Da emlang leh kiwa mihkhmat na ki 11 tylli ki District Association kiwa da tipmit da ka MCA kiwa da yoh wow Vote ha kani ka Election.
Yei pyrtuid kiwa yoh u thap Vote da pynmih ha ka 10 tarik uni u bnai, i thap pyrtuid ki kyrtong da pdiang ha ka 14 tarik heiwa da em 11 tylli ki pyrtuid heiwa u Bhattacharjee, u Kharkongor wa u Shira toh du ki kiwa thap pyrtuid ha ki kaam wa yaleh ki.
Ya ki kot ki sla da sylli pyn ha ka 14 tarik hi wei da chem wa waroh toh kiwa biang tangwa 3 ngut da kynran dien ki ha ka sngi wa bood kiwa yaleh VP, Treasurer wa Member (Councillor) wa da chah jied u Momin khlem em de kiwi ki kyrtong.
Kamtæ ka thap Vote da yaleh du neibynta u VP wa Treasurer.
