15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Pynman esikai ka MSCSO hajrong ka phang “Health and Sanitation” ha Moopynieiñ, Wapungskur

0 Comments
Advertisement ad1

Wapungskur: Ka Moopynieiñ Socio-Cultural & Sports Organisation, Dong Moopynieiñ, Wapungskur, East Jaiñtia Hills District, da pynmna ko ya ka Awareness Programme halor ka phang “Health and Sanitation” ha ka hall yong ka K.B. Memorial Sec. School, Wapungskur ha 31-08-18.

Ha kani ka Awareness Programme da wan chimbynta da ki khynnah skur wa kiwa sikai yong ki skur kiwa em hapoh ka Dong Moopynieiñ, nadooh ka K.B. Memorial Sec. School, ka Wering Memorial DC LP School, ka Step By Step Sec. School, ka Wapung Moopynieiñ LP School, kiwa yahkhmat ka Dorbar Dong Moopynieiñ wa kiwa chong chnong yong ka chnong Wapungskur, wei ya ka programme da pynlai da u Shaniahskhem Dkhar, President yong ka MSCSO.

Ki Resource Person kiwa wan wow e sikai toh halor ka tai ka phang ‘Health and Sanitation’ toh u MH Dkhar, President  ka All Jaiñtia Youth Welfare Organisation-Central Body (AJYWO-CB), u Cherity Suja, Secretary, KSU-Khliehriat Circle, u Dr. F.A. Lamin, Medical and Health Officer-Wapung-Pamra PHC wa u Reuben Nongtdu, Sub-Divisional Officer, PHE (Electrical Sub-Division) Khliehriat.

U Reachingson Siangshai, Adviser yong ka MSCSO, ha ki ktien waiphang yong oo da pynsñiaw u yei thmu yong ka seiñ wow pynman ya kani ka Awareness Programme toh neidaw wa sñiawkhia ka seiñ ya i emkaam wow yoh ya ka chait ka khiah kawa biang wei i sñiawemkaam  wow man ka chnong ka thaw kawa khooid.

U D.L. Rymbai, Secretary yong ka Dorbar Dong Moopynieiñ, da kyntu u ya ki paidbah wow kiar na i pynemkaam ya ka plastic wei wow pynemkaam ya ki tin noh-jhep ha ki thaw wa em ki.

U MH Dkhar, da ong u, “I yoo i wa boon ki khynnah  wa yoh distinction ha ka Health Education ha ka SSLC examination, tangwa sñiawsih won u yoo wa ki jooh ki khynnah wow ym em bood ki ya iwa puræ ki.”

Da ong u leh wa i leh tngit, i boon ki jakhlia daw wanrah ko ya ki jait kjut wa boon jait wei toh u em i bahkhlieh ha uwi pa uwi wow man kiwa leh khooid hei yong samen kamjooh leh hapoh ka chnong ka thaw.

U Dr. F.A. Lamin, da ong u wa, “Ki ri wa sdang ku namo ki Developing Countries kiwa kynthup ya ka ri India em ki boon ki kjut ki chitom du na ki daw wym sait kti wei du neiwa leh ya ini da ye u pyndooh 50% na ki kjut wa poor namo ki Communicable Diseases, kiwa wanrah ya ki jait kjut jait chitom wa boon jait.

Chooh chooh, u Dr. Lamin da batai u chaphang ki Bio-degradable wa Non-biodegradable waste namo ki jhep wa ye u pyut wa ki wym ye u pyut wei kammon u pynkylla sboh ya kiwa ye u pyut wei kammon wow noh ya kiwa ym ye u pyut.

U Reuben Nongtdu, da batai u kammon wow pynduna yei pynmih jhep deiwa pynemkaam ya ki 3R – Reduce, Reuse wa Recycle. Da kyntu u ya ki khynnah skur wa ki paidbah wow pynduna (Reduce) ya kiwa pynsih ya ka rymaw deiwa thied du ya ki tiar wa emkaam ki. Chooh chooh, da kyntu u wow pynemkaam boonsien (Reuse) ya ki tiar, nadooh ki that, ki klong plastic, ki tiar Electronics wei lada ym pynemkaam ya ki ye u e cha ki bru kiwa pynemkaam ki wei ym toh u noh ki wei da pynchlur u leh ya ki bru wow Recycle.

Ha kani ka jooh ka sngi, ka MSCSO de e ko leh ya ki tin Dust Bin  wa heh cha waroh ki skur kiwa wan chimbynta.

“Ka MSCSO, lyngba kani ka kyrwoh da booh ki leh ya ka kyntu wa i maham ya ki paidbah kiwa lai wa wan lyngba ka surok bah NH-6 (nachwa NH-44) wow kiar ki nei noh roi ya ki plastic wa ki jhep hapoh ka Dong Moopynieiñ wa ka chnong Wapungskur hi waroh kawi wei lada chem ya kiwon kiwon kiwa tyngkheiñ ya kani ka maham, ka seiñ daw kem wei daw e kti cha kiwa yahkhmat ka chnong yow pynchitom ya ki.” pynkut ka kyrwoh na u Reachingson Siangshai, Adviser yong ka MSCSO.

 

Advertisement ad1
Share this:
Previous

Ka sngi chuti ha ka 18 tarik ha EJH

Next

Da pynkrehkaam ya ka Section 144 CrPC hapoh RB wow yada ya ki um ki wah