Ka Angel’s Garden Park Committee hajrong ka thong wow pynchlur ya ki khynnah, da pynman ko ya ka 1st Kids Fashion Show ha Angel’s Garden Park kawa em ha GHM Guest House, Caroline Colony, Jowai ha ka 18 tarik uni u bnai.
Chwa wow sdang kani ka Fashion Show da em ka yalang wa tbian heiwa u Executive Engineer ka PHE, Umsning u S. Najiar da man u kam u kongsan.
Neiliang u tre yong kani ka Park, u GM Lamar hawa e yei klam da ong u wa i daw wa pynman ya kani ka Fashion Show toh wow pynchlur ya ki khynnah wow chimbynta ki ha kiwi ki jait yakob.
Da pyntip u leh wa i daw wa chna ya kani ka Park toh wa ha Jowai dang duna bha ki thaw uiñke wa ki thaw wow pynwyrngia ki khynnah wei deiwa em kam kani ka thaw daw yarap ko wow pynku ya i kaam uiñke suwari ha Jowai.
Neiliang u S. Najiar hawa e yei klam da e khublei u ya u GM Lamar wa da chna ya kani ka Park neibhah wa katkam wa man katni ha Jowai ka-it ki bru u lai du cha Syntu Ksiar tangwa katni da ye ki bru wow yahke ya ki khon cha kani ka thaw.
Ha kani ka sngi da yoh leh i kyntien ngoohblai na u Rynsong Suting wa ki kyntien khublei na u Dauru Laloo.
Ha waroh da em 44 ngut ki khynnah wa chimbynta ha kani ka Fashion Show.
