Ka Balang Presbyterian Ummulong da pynman ko ya ka pynsñiawthooh paidbah namo ka Awareness Programme ha Youth Centre yong ka Balang ynne ka sngi hajrong ka phang “I sih wa mih na ki yudih pynmuaid“.
Ya kani ka yalang da pynlai da u Rev. N.S. Phawa heiwa da yoh yei klam pdiang na u Tbn. E. Lamare, da yoh leh yei pynsñiawthooh hajrong kani ka phang na ka Dr. Joyantimon Lyngwa kawa da man kam ka Resource Person heiwa da pynsñiaw, pynche wei pynsñiawthooh ko ya chiboon jait sih wa mih ha kini ki sngi nei pynemkaam ya ki jiat dih pynmuaid kam ki drugs, kiad, bhang, duma wa kiwi tawan ki yudih wa pynmuaid. Ka Doctor da batai pynche ko leh wa kammon kini ki yudih pynmuaid da ktah bha ko yei chait i tram, yaka imlang sahlang wa i yoh i kot yong ka yung ka sem.
Neiliang ka Police Department da e yei klam da ka S. Sumer, Ummulong Police Beat House katwa da kyrchaan yei klam ka Doctor wei da yoh leh ya ki kyntien e burom ya waroh na u Rev. R.I. Laloo.
Hadien wa dep kani ka yalang da pynman won yei lai paidbah namo ka Rally cha ki thaw pynman yaaw yong ka chnong Ummulong heiwa da ya chimbynta da ki khynnah skur yong ka Ummulong Presbyterian Higher Secondary School, ki khynnah puræ ka Ummulong Presbyterian College, kiwa sikai skur wa College chirup wa ki dkhot ka Yaseiñ Khynroo wa ki dkhot ka Committee Balang heiwa da rah leh ya ki yuthoh wa ki dro waphær waphær hajrong katai ka phang.
