Ka yung krehkaam yong ka District Mission Coordinator, SSA-West Jaiñtia Hills ha ka thong wow ye u pynjanai yei rukom krehkaam yong waroh kiwa toh kti toh bynta u pait u yoo yei miat i bha i puræ puthi wei lai bait lai ryntih ki skur wa em hapoh ka West Jaintia Hills District, ha ka 22 tarik uni u bnai da pynman ko ya ka Review Meeting næ ka yachemlang wa kyrpang ha Conference Hall yong ka yung krehkaam u Deputy Commissioner.
Ya kani ka yalang da pynman hei pynlai ka M. Lakiang, DMC, SSA- West Jaiñtia Hills hei emlang leh u B.S. Sohliya, Deputy Commissioner West Jaiñtia Hills uwa man leh u Chairman SSA, West Jaiñtia Hills, ki Block Mission Coordinator, ki BRP, CRP wa ki BRP-IE.
Ka M. Lakiang, DMC, SSA West Jaiñtia Hills hawa klam yahkhmat da pynsñiaw ko chaphang ka SSA wei da khana leh yei chem yong ka heiyatoh wei tam i duna, i lait i bakla yong ki skur, kamtæ kyrsu kyntu ko ya ki BRP, CRP wow man kiwa bniah hawa li pait li yoo ya ki skur na ki por cha ki por wei wow kitkhia leh yei kaamram ha iwon iwon i por wa dawa i kaam.
U B.S. Sohliya, da sneiñ da kroo, kyrsu kyntu wei e mynsien u ya waroh kiwa tohkaam hei wow pait u yoo yei miat i bha i puræ puthi wei lai bait lai ryntih ki skur wa em hapoh ka District. Ong u leh kwah u wow yoo wa ka West Jaiñtia Hills u man ko kawi na ki District wa rap chajrong wei wow yoh yeini waroh toh u em i yakrehlang wa yajan tam nadooh na tre hadooh ha khlieh.
Chooh chooh ha kani ka Review Meeting ha ka thong wow ye u pynjanai yei rukom krehkaam neibynta i miat i bha yong i puræ puthi ha waroh ki liang da chimbynta leh wow yaklam ya kynchiap ya kiwa boon ki mat da ki Coordinator waphær wa kynthup yow L.K. Singh (IE Coordinator), u R.L. Bimee Suwer (MIS Coordinator), u Esalan Dkhar, (Planning Coordinator), u Pikee Suwer (FAO, SSA), u D. Manner (Jr. Engineer, SSA), u S. Laloo (Community Mobilizer) deilang ki BRP, CRP yong ka Thadlaskein, Laskein wa ka Amlarem Block.
Discussion about this post