Ka Dorbar Chnong Dona Skur da pynman ko yei pynsñiawthooh paidbah namo ka Awareness Program haka 4 tarik uni u bnai hapoh chnong hajrong i chongkha khynnah (Child Marriage) wa i dih drugs (Drug Abuse).
Ya kani ka yalang da chongknor wei pynlai da u Jesting Amse uwa man leh kam u Assistant Waheh Chnong.
Da yoh ya ki kyntien pdiang burom na ka Martina Suting kawa man leh kawi na ki dkhot ka Executive Committee yong ka chnong.
Ha kani ka pynsñiawthooh da wan wow sakhi u ap u sñiaw da kiwa boon kiwa chong chnong nadooh ki manbei manpa, ki khon khynroo khyllood yong ka chnong chirup deilang wa ki dkhot ka Executive Committee yong ka chnong.
Ki bru chemphang kiwa da e yei klam toh ki sahep sorkar kam ka District Child Protection Officer, ka Twinnity Nongtdu kawa da klam hajrong i chongkha khynnah, neiliang ka PHC-Umkiang da yoh yei klam na ka Dr. R. Lyngdoh waka Daia Lamare kawa man leh kam ka Nurse kiwa da klam hajrong i pynemkaam drugs wa chaphang u khñiang HIV wa i kjut AIDS.
Ha kani hi ka yalang da yoh leh wow pynkup burom ya ki khon yong ka chnong kiwa da lehbha ha ka puræ puthi nadooh ka Matric chaneiñ yong u snem 2023.
Da pynwai ya kani ka yalang da ki kyntien e khublei ya kiwa kreh yong ka sorkar kamjooh ya ki paidbah yong ka chnong da u Jop Lamurong, Asst. Secretary Chnong.
Discussion about this post