Kam chibynta wow kyntu yei yoh i kot yong ki Self-Help Group (SHG), ka Jaiñtia Hills Development Society (JHDS) deiwa ya krehlang waka yung krehkaam ka District Social Welfare Officer East Jaiñtia Hills District da pynman ki yei e sikai wa ar sngi hajrong i chna marbaam.
Ya kani ka e sikai da wai ha ka 26 tarik uni u bnai da ka District Social Welfare Officer East Jaiñtia Hills District, ka R. Passah. Da pynman ya ini ha ka chnong Mynkre deiwa ya emlang u Waheh Chnong ka Mynkre, u Sunny Bareh wa kiwi de ki bru waheh.
Hawa e yei klam ha kani ka sngi wai, u Sunny Bareh da kyntu wei e mynsien u ya ki dkhot yong ki SHG wa toh u chimkhia ya ini i e sikai wei wow pynemkaam hok yei sikai wa da yoh ki. Chooh chooh da e khublei ya ka JHDS wa ka Social Welfare Department kiwa da chimkhia wow pynman kam kani ka e sikai neibynta i myntoi kiwa boon.
Neiliang ka District Social Welfare Officer da kyntu joor ko ya kiwa chimbynta wa toh u pynlai yumut bha ya i kaam wa ki kreh ki wei ymtoh wow jhan u yoh nong tangwa toh u neh chah wow e yei por wow lait nei kut chiteiñ i kaam wa da sdang ki. Da e buit ko leh ya ki SHG wow pynemkaam leh ya ki soh ki pe wa mih ha jar jiar ki chnong ki thaw neibhah wa man ki kiwa bha wa kiwa boon ki Vitamin wa kiwi de kiwa emkaam u bru.
Ha kani ka sngi da yoh leh yei batai hajrong i hok yong ki manbei wa ki kynthai wa da e da ka H. Pale kawa man kam ka muktiar ka One Stop Center Khliehriat kaw da klam hajrong kiwa boon ki aiñ kiwa yarap wow yada ya ki kynthai nei chah thombor (Domestic Violence & Crime Against Women). Da kyntu joor ya ki manbei wa ymtoh u tieñ hawa yachem kam ini i eh tangwa toh u wan chakhmat neibhah wa em ki aiñ wow yada ya ki.
Da pynlai ya ka yalang ha katai ka sngi da u Co-Ordinator ka JHDS u Denis Kurkalang uwa da maitphang leh yei thmu kani ka e sikai. Da yoh leh ki kyntien e khublei na u Remigius Pyngrope uwa man kam u Cluster Coordinator ka JHDS.
