Ka JSM Mynsngat Unit chirup dei ya krehlang wa ka Central Body da yoh ko wow pynman ya ka 7-A-Side Football Tournament 2021 kawa nyngkong ha chnong Mynsngat ynne ka sngi.
I thmu wa pynman ya kani ka Tournament toh yow pynmih poisa neibynta wow yarap ya ki khonswet khonrangli, khamtam ya kiwa em i duna ha i doh i pran.
Hachwa wow sdang ya kani ka Tournament, da em ka yalang wa tbian kawa da pynlai da u Phresmi Suting, President ka JSM Mynsngat Unit deiwa emlang ki dkhot waroh yong ka JSM Mynsngat wa ki dkhot yong ka JSM (Central Body).
U Paila Kordor Lyngkot uwa man kam u kongsan ha kani ka sngi, hachwa wow pynhær ya ka lama yong ka seiñ kam ka dak wow wai ya kani ka 7-A-Side Football Tournament 2021 deiwa e mynsien e bor u ya ka seiñ kawa em kam ini i thmu wa bha wow pynmih poisa, khamtam wow yarap ya kiwa emkaam sakhiat wow yoh ya i yarap. Da ong u wa kam ki seiñbhalang kiwa em i kitkhlieh ya ka yap ka im emkaam wow toor chaphrang kam ki chipai neibynta ka ri wa ka jaitbru.
Da e u leh ya i kyrkhu kyrdoh ya ka seiñ waroh wow nang ku ki chaphrang ha ki kaam wa bha ha ki liang waroh.
Kiwi tawan kiwa klam ha kani ka sngi kynthup ki ya u Lammi Syad, Working President JSM (Central Body), u P.S. Phawa uwa man leh u In-charge yong ka West Jaiñtia Hills District wa na u Ajidius Sateiñ uwa man leh u Secretary yong ka JSM Mynsngat Unit.
Haka yalehke wa nyngkong yong kani ka Tournament da pynman hapyrdi ka Chirup Deilang FC pyrchah ya ka Nida Ksoo FC heiwa ka Chirup Deilang FC da jop ko da 3-2 kool.
