Ka Jaiñtia Tourism and Environment Society (JTES) Jowai kam chibynta i lehkmen yei dap 50 snem ka jylla, ynne i step ka 26 tarik da pynman ki da ka yakob ku rana “Golden Climb” lane ka “Stairway Climbing Competition” ha u rana wa em hajan ka yingkieñ Myntdu yow ku chadooh cha Caroline Colony Jowai.
Chwa wow sdang ka yakob da em ka yalang wa tbian heiwa da emlang leh u Deputy Commissioner ka West Jaiñtia Hills, u Garod LSN Dykes, ki dkhot ka JTES wa kiwi najrong kiwa chimbynta.
U DC hawa e yei klam da yaroh u ya ka JTES kamjooh ya kitu wa em yei mynsien chimbynta. Da kyntu u ya kiwa chimbynta ha kani ka yakob wa kam ka thong wa da wan ki ynne toh u man ka thong wow jop ha kawon kawon ka kaam.
Da ong u leh wa i jop ym mut du kiwa yoh nyngkong wa ar wei wa le tangwa waroh kiwa chimbynta man ki kiwa jop.
Da yoh leh yei klam na u Founding President ka JTES u MS Lhuid, u President ka JTES, u Philemon Lyngdoh wa kiwi.
Ha kani ka yakob da wan wow chimbynta da ki kynthai kiwa em 14 ngut wa ki chynrang wa em 50 ngut naki chong waphær waphær wei ki rana wa da hap wow ku da em ki 400 tylli.
Na ki chynrang da yoh nyngkong u Buromlangki Salahe, wa ar u Allan Rymbai wa le u Teiboklang Biam.
Ha ki khynthai da jop ka Pynhun Chullet, wa ar ka Phyrnai Kyndait wa le ka Nangkiewsuki Slong.
Kiwa yoh ya ka 1st Prize da yoh ki T. 4000 waka Certificate, kiwa yoh wa ar T. 3000 waka Certificate, kiwa yoh wa le T. 2000 waka Certificate katwa waroh kiwi kiwa chimbynta da yoh ki da ka Consolation Prize.
