Jowai: Ka Jaiñtia Youth Development Society (JYDS) ynne ka sngi da pynman ko yaka e sikai wa chisngi ha Bosco Pnar, Jowai neibynta ki khynroo khyllood heiyatoh wa kammon u man kam kiwa yahkhmat ya ka mynstep ka mankawi ha kiwa boon ki liang, hajrong ka phang “I man wa yahkhmat ha kani ka spah snem wa katni, ki khynroo khyllood katni ki wow yahkhmat ya ka mynstep ka mankawi.”
Neiliang u President kani ka Society u Damanleki Lathong hei klam yahkhmat yong oo da ong u, i pynman ya kam kani ka yalang toh yow saam lang cha kiwi yeiwon iwon iwa tip næ chemphang wym toh u kun du ha samen, neibhah boi ye u man haki snem wada lai du neidaw wa duna kiwa yahkhmat kiwa e yumut wow pynsñiawthooh yaki khynroo khyllood tæ boon da chah ieñ ki ha ki kaam wa sih wa boonjait.
U Dawan Lyngdoh, MDC ka JHADC da ong u yow man kitæ kwai yahkhmat nyngkong hi toh u biang chwa ha i hi ka akor salon, neitæ u biang i yatoh wa ki lok ki jor næ jan yung jan sem.
Da yooluti u wa ki khynroo khyllood hadien wa yoh ki yei sikai u pynemkaam ki hei rukom wa toh neibynta u yahkhmat yaki hi, yaka yung ka sem kamjooh ka imlang sahlang haki bynta waphær waphær.
“Hao wym ye u len wa im i katni haka pyrthai kawa da che tangwa han la kattæ leh dang em hi i doom haki liang waphær waphær, i daw hi toh wa dang duna kiwa yahkhmat,” da ong u Heipor Bang, Headmaster ka K.B. Memorial Secondary School Wapung hawa e yei klam kam u kongsan.
Yaka yalang da pynlai da u Kmenlang Ki Dhar General Secretary, Jaiñtia Youth Development Society, da emlang u Brother B. Khriem Director Bosco Pnar Institution, u E. Swer Dolloi Elaka Rymbai, Phermon Suchen waheh dong Salini Colony wa kiwi kiwi katwa yei ktien e khublei da yoh na u Rishot Thubru.
Hadien wa kut ka yalang u Terence Sawian kam u bru chemphang da e u yei sikai wow pynsñiawthooh cha ki khynroo khyllood heiyatoh wa kammon u man kiwa yahkhmat.
Discussion about this post