Ha ka 10 tarik uni u bnai, kam chibynta wow lehkmen ya ka sngi laitlooid ka ri, ka Kyrmen Foundation da pynman ko ya ka Awareness Cum Voluntary Blood Donation Camp ha ka chnong Madankynsaw- Mowkyndeng, West Jaiñtia Hills heiwa da em 8 ngut kiwa da e snaam sñiawbha.
Ha kani ka sngi da wan wow sakhi lang da u Montri ka sorkar jylla, u Kyrmen Shylla kam u kongsan uwa da yaroh ya ka chnong wa da smat ko wow chimkti ya kani ka e snaam wei da sñiawngooh u ya waroh kiwa da embynta wow pynman ya kani ka sngi kawa sahkynmoo wei kawa khroo.
Da pynsñiaw u leh yei sñiawngooh ya waroh wei da kyrpaad u ya ka chnong wow pynman ya kam kani ka e snaam sñiawbha man-u-snem.
Ka chnong Madankynsaw-Mowkyndeng hapoh i yahkhmat u Waheh Chnong, u Bud Rimanki Chympa, da man ko ka chnong wa nyngkong wow pdiang wei chimbynta ya kani ka Awareness Cum Voluntary Blood Donation Camp ka Kyrmen Foundation kam ka chnong hi waroh kawi.
Neiliang ka chnong da e ko leh yei kyrkhu kyrdoh ya ka Kyrmen Foundation wa ya waroh ki bru yong ka yow nang ye chooh chooh ko wow pteiñ ya ki kaam yarap para bru.
Ha kani ka sngi da emlang leh ki heh District nadooh u Wankhraw K. Kharbuli, ADC kam u symbood kongsan, ka Dr. I. Khyriam, Senior Medical and Health Officer, u BDO ka Laskein Block, u Barister Niang, ki waheh chnong ka Nongkynrih, Mowlieh, Mulum wa Raliang.
Discussion about this post