Ynne ka sngi, ka Kyrmen Foundation chirup i yakrehlang waka Hawahoi Socio Development Society, deilang waka Kiang Nangbah Government College Students’ Union chirup waka Civil Blood Bank Jowai da pynman ki yei e snaam sñiawbha kamjooh leh i pynsñiawthooh cha kiwa puræ kani ka College hajrong i kordor i snaam neibhah wa pynim ko ya ki bru wa em ha kyndian i im.
Haka yalang tbian chwa wow sdang i e snaam sñiawbha, neiliang ka Dr. P. Shylla Senior Medical Officer In-charge ka Civil Blood Bank Jowai da batai bniah ko heiyatoh i rukom e snaam wei kammon yarap i ya ki bru wa em hapyrdi i kjut chitom.
Pynche ko leh wa napyrdi ki le jait ki rukom e snaam wa kynthup ki Voluntary Blood Doner, Replacement Blood Doner wa ki Professional Blood Doner, toh du ki Voluntary Blood Doner donhi wa e i chngaaiñ wei pyndap pynbiang snaam ya ka Blood Bank yow ye ko u lai chakhmat lym kamtæ ka Blood Bank man ko kawa thylli.
Neiliang u Lasky Rymbai, Dy. CEM ka JHADC hawa klam kam u kongsan da yaroh u ya ki khynroo khyllood wa da mih ki chakhmat heiyatoh wa kani ka bynta wei kani ka bynta wa chim ymtoh wa em ki du i mynsiem sñiaw wyrai, tangwa da pynyoo ki leh dei kaam yeiwa sñiawkhia ki neibynta ki para mynsien.
Kiwi won wa e i klam kynthup ya ka Dr. Easter Meena Blah, Principal Kiang Nangbah Govt. College Jowai, ka Simi Khongthiang, Secretary Kyrmen Foundation, u Fedrick Synnah naka Hawahoi Socio Development Society, na u Evermore Rymbai, President KNGCSU, naka Aitimary Mawlong wa kiwi haka yalang wa pynlai da u Achilles Rupert Pariat.
Discussion about this post