Ka District Project Management Unit yong ka Meghalaya Basin Management Agency (MBMA) da pynman ko ya ka e sikai namo ka Workshop wa chi sngi wow ya phyllu wei wow ya e buit lang kammon wow jop hei khih i khan hapoh ka Megh-LAMP ynnin ka sngi kawa da pynman ha Ladthadlaboh Indoor Hall, Ladthadlaboh heiwa u Wailadmiki Shylla, MLA da wan u wow chimbynta kam u kongsan.
U Wailad hawa e yei klam da pynchlur u ya kani ka chnat sorkar wei da e buit u leh wow pynkrehkaam da ki jait kaam wa daw e yarap kiwa daw ye u pynyoh nong wei kamjooh kiwa ye wow e kreh.
Neiliang u Sywell Lyngdoh, DPM, District Project Management Unit (MBDA/MBMA), West Jaiñtia Hills da ong u wa ka thong kani ka Workshop toh wow e buit cha ki warep kamjooh kiwa khayi pateiñ ha ki mar rep yow tip ki kammon u leh yow pynku yei khih i khan heitæ i rukom wow neh wei dei wym ktah ya ka rymaw.
Da wan wow khana yei rukom kreh wa da pynman yei khih i khan iwa jop da kiwa mihkhmat na ki 4 tylli ki Integrated Village Cooperative Society (IVCS) kiwa da ong leh hadooh katwon yoh myntoi ki na ki Scheme sorkar wa da pynkrehkaam ha ka thaaiñ yong ki.
Hachwa ini da pynman leh yei ya phyllu yumut namo ka Panel Discussion hajrong ka phang “Inclusive supply chain and enterprise development” wa ka “Impact of Rural Finance in West Jaiñtia Hills District” deiwa chimbynta u Dr. H.H. Mohrmen, u Fr. James Syiemlieh, u Chanky Lyngdoh wa u Commander Shangpliang wa kiwa mihkhmat na ka Sesta.
