Jowai : Ka Rovers Scout and Rangers Guide na ka Jowai Open Unit (MBS&G-WJHD) da pynman ki ya ka Over Night Camp and Training ha ka Community Centre Pdengshakap, Solyntiar ha ka 1 tarik wa 2 tarik u Kmaichonglad.
Kani ka esikai næ ka camp da pynman kam chibynta wow esikai ya ki Aspirant Rover wow man kam ki Scout wa ki Ranger wow man kam ki Guide.
Ha waroh ki Aspirant Rovers wa ki Rover (kiwa da man Scout) em ki 14 ngut katwa ki Aspirant Rangers wa ki Ranger (kiwa man ki Guide) won da em ki hadooh 17 ngut.
Ya kini ki dhab da yahkhmat da u Unit Leader u Adiam-u Bthuh, District Organising Commissioner (Scouts) wa ka Unit Leader ka Sngi Hadia (Guide Captain).
Ha ka sngi nyngkong da esikai wa kammon u man ki bru kiwa da pynkhreh nadooh ki thaw sah thaw chong, khamtam ki paikhana, ka Flag Ceremony, ki yalehke pynwyrngia wa harukom, wa i thang diñ sñiawbha ya kawa tip leh kam ka Camp Fire.
Ha ka sngi wa ar ynne ka sngi da e sikai cha ki khynnah wow man ki ki khynnah kiwa da pynkhreh lada em iwon iwon i jia wa syndet kam i iñ diñ, i ngam um, i khih khmi wa kiwi kiwi ya kiwa tip kam ka First Aid.
Da pynman leh ya ki esikai wa harukom ha kani ka sngi kam ka Flag Ceremony, wow thaiñ wow kdoh tylle, u ku dieñ, wei wow ye ki u im cha ki khloo ki kjam lada dawa i kaam ya ki, wa kiwi kiwi.
Ya kini ki ar sngi ki esikai ya kini ki khynnah da e yarap poisa leh na ka GFD Store, W.L. Store wa na ki kattu katni ki dkhot kam u ma Ebormi Iongwai, ka kong Emidaka Lyngdoh wa ka kong Meda Dkhar.
Discussion about this post