Ka yung krehkaam ka One Stop Centre East Jaiñtia Hills District da pynman ko yaka Orientation & Sensitization ynne ka sngi ha Conference Hall, DC ha ka yalang wa pynlai da u Teibor Kyndiah, District Child Protection Officer.
Ha kani ka yalang da emlang leh u Montri ka chnat Social Welfare, u Kyrmen Shylla uwa da ong wa emkaam bha leh u burom i ya ki kynthai neibhah ki kynthai toh wa pun wa kha, wa kit wa bah ya i nadooh wa kha hadooh wa heh wei na ini i daw toh u burom i ya waroh ki kynthai kamwa burom yaka bei wa ri wa sumaar ya i. Chooh chooh da ong u leh wa emkaam hi leh wow pynman kam kini ki kynja yalang ya waroh ki waheh chnong yong ka District khnang wow yoh ki yei batai deiwa bniah.
U Abhilash Baranwal, Deputy Commissioner ka East Jaiñtia Hills District uwa man leh u Chairman ka District Level Task Force Committee One Stop Centre da ong u wa da pynman ya kani ka yalang pynsñiawthooh wa kwah u leh wa waroh ki sahep sorkar ki chnat waphær waphær u yakreh lang ki waka One Stop Centre khnang wow yoh yada bha ki kynthai khamtam ha kani ka District leh yow ye u pynduna ya ki kaam thombor ya ki khynthai.
Ka Ripaia Passah, District Social Welfare Officer, East Jaiñtia Hills kawa man leh ka Member Secretary District Level Task Force Committee One Stop Centre da batai bniah ko wa kammon i rukom krehkaam ka One Stop Centre weiwa da pynche ko leh kam kiyi de i emkaam wow yoh laad yarap i na kani ka One Stop Centre.
Neiliang ka yung krehkaam ka One Stop Centre sñiawkmen bha ko wow pynsñiaw wa yoh sahep kam kani kawa kreh chitom bha miet wa sngi wow pynmiat pynbha ya kani ka One Stop Centre.
Ka Melody War, Additional Public Prosecutor, East Jaiñtia Hills da klam ko chaphang ki aiñ wa ki kyndon wa kammmon krehkaam ki neibynta wow yada ya ki kynthai iwa da pynyoh myntoi leh chiboon bha ya kiwa ya emlang ha kani ka yalang.
Ka Colleen Michelle Lyngdoh, Case Worker ka One Stop Centre, East Khasi Hills da batai bniah wei ngam yillu bha ko wa kammon krehkaam ka One Stop Centre hapoh ka ri wa ka jylla waroh kawi wei wa da batai bha ko leh kammon i rukom krehkaam ki wakreh hapoh kani ka yung krehkaam iwa da pynyoh myntoi bha ya ki wakreh ha kani ka thaw.
Neiliang ka yung krehkaam u Superintendent of Police, East Jaiñtia Hills da klam da u Wanroi Lato, UBSI heiyatoh wa kammon u ya krehlang ki waka One Stop Centre wei leh da e mynsien u leh wa ym hoi u tieñ u wan chakhmat wow ujor cha ki thanat lada chem ki ya iwon iwon i eh neibhah barabor hi ki bru yong i tieñ ki u wan cha ka yung krehkaam ki pulit, deiwa ong wa ki pulit man ki ki chakri yong ki paidbah katwa kamtæ kyrpaad u wa emkaam leh wow ya krehlang ki wa ki pulit khnang wow ye u pynlai bait yei chongsuk chongsaaiñ hapoh ka District yong i khamtam hawa yatoh wa ki kaam chah thombor ki kynthai.
U Dr. D. Shylla, DM&HO ka East Jaiñtia Hills District da batai u leh kammon u ya krehlang ki wa ki One Stop Centre lada jia em iwa jia (Case) wa wanrah da ki One Stop Centre cha ki Hospital.
Ya ki kyntien e khublei da e da u Tellme True Phawa, IT Staff ka One Stop Centre deiwa e khublei u ya waroh kiwa klam wa ya waroh ki sahep wa ki NGO kiwa emlang ha kani ka yalang.
