Ka Padu State Dispensary wa haap hapoh ka Amlarem Civil Sub-Division, West Jaiñtia Hills ynne ka sngi da pynman ko yei e tika COVID-19, kamjooh leh i pynche paidbah hajrong i emkaam wow chim tika neibynta u yada ya idæ kamjooh leh yaka yung ka sem.
Yeini i e tika wei pynsñiawthooh paidbah leh da sdang naka chnong Padu hi ynne ka sngi haki ar tylli ki thaw, itæ toh ha Padu Bah wa ha Padu Mawsku, hei ya embynta nadooh u SDO ka Amlarem Civil Sub-Division u Abhilash Baranwal, u J. Shylla, Magistrate Amlarem Civil Sub-Division, u Het Pohthmi MDC ka thaaiñ, u Dr. A. Khonglah Medical Officer In-Charge Padu State Dispensary, najrong kiwa yahkhmat chnong, kiwa yahkhmat seiñbhalang, ki paidbah wa kiwi.
Hawa e yei klam yahkhmat, u Dr. A. Khonglah ong u wa kani ka tika yarap ko wow pynboon ya ki chipai yada (Anti-Bodies) hapoh i snam u bru, wei lada jia wa yabi uni u khñiang leh rap duna i chitom, najrong wym emkaam ware u lai cha ki Hospital yow chah sumaar daki kor ki bor wa syad dor, heiwa da e nongmuna haroh u ya kawi ka tre chnong wa yabi COVID-19 tangwa neidaw wa da pyndep ko yaka tika waroh arsien kamtæ wym em chitom joor ko deiwa hap dih dawai du ha yung donhi.
“Wym mut hawa da dep e tika ym yabi kjut de tangwa ye u yabi heiwon iwon i por neibhah wym ye u tip næ chynna, wei u yait na uni u khñiang leh man kawa eh, kamtæ emkaam u yoh chwa yei yada khnang yow ye u pynduna nei chitom,” ong u Dr. Khonglah.
Lada ku ki bru wa e tika hadooh 80%-90% iwa mut uni u khñiang COVID-19 ym yohlaad de u wow psiah hapoh ka chnong neibhah ha waroh ka met kiwa chong chnong da em dawai yada, wei ye leh u sdang im kamwa man nachwa.
U Dr. Khonglah khana haroh u wa kamwa man kattæ ha Padu Bah kiwa da dep e tika em ki 30%, katwa ha Padu Mawsku won 29%.
U SDO ka Civil Sub-Division u Abhilash Baranwal, IAS ong u, “Im i haka imlang sahlang wa hap u li kreh li khih, u yachem wa kiwa hayung hasem wa ki paralok, na ini i daw emkaam u chim tika khnang yow ye u khanglaad nei poor kani ka khlam wei ye u poi biang chei rukom im kam nachwa”.
Khana haroh u wa kiwa khlaad haka jylla toh ki wym pu em pyndep pura yaka tika, kamtæ hawa pyrkhat yaki spah ngut kiwa da khlad toh leh u pyrkhat yaki spah tylli ki manyung wa chah ktah haka jylla.
“Kam ki bru wa chaniah hei rep i riang wei kiwa khih na kti ha ktien, lada kheiñ stiñ boi ye u em kiwa ha yung wow poi Hospital nei chah ktah, heiwa ini daw ktah haroh ko yei lut i sep,” ong u J. Shylla Magistrate Amlarem Sub-Division hawa klam kyntu yaki paidpah u wan ki chakhmat neibynta u chim tika.
U MDC ka thaaiñ u Het Pohthmi uwa da pyndep leh yaka pali wa ar yong i e tika ynne ka sngi ha Padu Bah, ong u kam kiwa chong chnong toh u em i bahkhlieh nyngkong neibynta samen samen waka yung ka sem.
Kiwi won wa e yei klam naka chnong Padu ha kani ka sngi kynthup u Tohmon Diam Mukhim, u Stelin Mukhim, u Selut Pohshna wa u Apmon Ñyalang.
