Jowai: Ka Police Public Secondary School, Jowai ynne ka 3 tarik da lehwarom ko ya ka sngi yong ki khynnah kamjooh ka sngi yong ki bei ki pa wa datip leh kam ka “Family Day Celebration” ha pchem ka skur hei wan u Marki Mulieh u MDC ka Jowai North kam u kongsan, hei emlang u Superintendent of Police, West Jaiñtia Hills, u Vivek Syiem (MPS), u Dy. SP P. Syiem, ki sahep ka tnat traffic wa kynthup ya u D.H. Pde, u P. Pohchen wa kiwi kiwi.
Chwa u sdang da pynhær ya ka lama da u Marki Mulieh chirup wa u Vivek Syiem wei i rwai pdiang burom naki khynnah skur.
Katkam ki ktien yahkhmat na u Asst. Headmaster u R. Syiemiong da khana u wa kani ka lehburom da man ko ka sien wa ar wa pynman ka skur, wei i daw wa chim ka laad u pynman 2 jait i rukom leh burom ha kani ka jooh ka sngi, wa kynthup ka sngi yong ki khynnah wa ka sngi ki bei ki pa deiwa pyrtuid a Family Day toh neidaw wa kyndian i por wow pynman jar jiar ki sngi wei yow lait ware u chim yei por ki khynnah skur.
U Vivek Syiem hawa e i klam pynsñaw u i kmen wakhroo wa du hadien 2,3 sngi wa wan ksoh u kam u SP wa thymme ka West Jaiñtia Hills da yoh u wow embynta ha kani ka sngi lehkmen Family Day kamwa oo hi leh man u kam u President yong kani ka skur, wei da yaroh u ya kiwa pyllai ka skur wa stat ki u pyrkhat kam kani ka sngi hei wow wanrah lang chirup ya ka sngi ki khynnah wa ki bei ki pa kam chi yung chi sem.
Da ong u leh wa man i iwa sakhiat kani ka sngi man ko kawa emkaam bha neibhah kam ki dkhot ka yung ka sem em chiboon ka bynta wow leh khamtam ki bei ki pa, wei iwon iwon toh sdang ki na yung la hei kaam wa sih næ wabha. Chooh chooh ong u emkaam u em i ya maya saya iwi yeiwi wei u yapyllut por wow yachem yumut yasneiñ yakroo ha yung chirup ki bei ki pa waki khon.
U Marki Mulieh da yaroh u ya kiwa sikai kiwa pyllai kani ka skur wa dei kreh chitom yong ki da ku ko chaphrang kat dang lai ki sngi. Da ong u leh katwon man i iwa sñaw sarong waka District da dang ku ko hei stat i tip kamjooh ha waroh ki liang.
Heijooh i por da kyntu u ya ki bei ki pa wow yah luti ki ya ki khon haki luti wa bha wei wow pynyoh leh haki i stat i tip iwa man iwa emkaam tam ha uwi pa uwi namo kawi pa kawi.
Neiliang u Marki wa u Vivek da chim ki leh ka bynta wow pynkup burom yaki khynnah wa da leh bha ha ka exam SSLC yong u snem 2017 wa kynthup ya u Pynsanmiki Suchiang uwa yoh 4 tylli ki distinction, u Moses Lyngdoh wa yoh 2 tylli ki distinction, u Mandymiat Khonglah, ka Balabanroi Dkhar wa ka Eborki Langstang kiwa yoh mar kawi ka distinction.
Heijooh i por ka Eborki Langstang da yoh ko leh ka Special Prize na uwa sikai Math uwa da pyndep yei kular wow e award ya kiwa yoh Distinction ha ka Mathematics.
Da pynchongchit ya kani ka sngi da ki program waphær waphær wa da chim bynta da ki khynnah skur.
Discussion about this post