Ka Rotary Club Jowai kam ka seiñ wa kreh neibynta i miat i bha ka imlang sahlang yong ki bru wa chong chnong, ha ka sngi Pynsin 10 tarik Kmaichonglad da khut kyrpang ko ya ki khynnah puræ ka Kiang Nangbah Govt. College, Jowai waka Thomas Jones Synod College, Jowai wow yaklam ya pachat yumut hajrong ka phang wa ong “Ka daw bah daw san yong i hiar kyrdan ka jaitbru Khasi-Jaiñtia ha kani ka juk wa katni”.
Ha kani ka yalang da wan ya chimbynta da ki waheh chnong, ki khynnah puræ wa kiwi kiwi kiwa chah khut sñiawbha deilang leh ka Professor Streamlet Dkhar, Former Dean, School of Humanities NEHU & President Indian Council of Social Welfare, Meghalaya State Branch kam ka Guest Speaker waka Bakhianmon Rynjah, Associate Professor Sankardev College Shillong.
Katkam ka rukom dustur yong ka Rotary of International da sdang ya kani ka yalang dei rwai ya ka National Anthem neitæ pynbood ka yalang wa tbian hei pynlai u Rtn. Samehi Laloo, President Rotary Club Jowai deiwa yoh i klam na u Rtn. J.M. Pohsngap (PHF) Past President RC-Jowai, ki kyntien chon yumut yong kani ka yalang na u Rtn. S.K. Lato, Director Community Service, RC-Jowai katwa u Rtn. Ruevene Nongtdu (RFSM) da puræ u yei parom wa tbian ka Professor Streamlet Dkhar kam kawi na ki manbei ka jaitbru Ynñiawtrep Ynñiawskum kawa da rah naam rah burom ya ka ri wa ka jaitbru heiliang i thoh sur poitri wa i thoh parom.
Ki khon khynroo khyllood wa mihkhmat ya ka Kiang Nangbah Govt. College wa ka Thomas Jones Synod College neibynta i myntoi yong ki waboon walang wa wan ha kani ka yalang da yaleh ki u sai u pynsñiaw jiar ki ñia ki yurim yong ki deiwa pynwandur yei klam i khana ha ki bynta ki rukom waphær kiwa man i hiardor nadooh na yung na sem, ka imlang sahlang, i roi i paar, i stat i tip wa kiwi kiwi.
Chooh chooh hadien wa yoh u ap u sñiaw yei klam i kappæ ki khynroo khyllood wa yachimbynta da kynchiap won leh sei klam i khana hajrong ki yurim i hiardor ka ri waka jaitbru na ka Renda M. Khonglah, Asst. Professor Khasi Department, Thomas Jones Synod College, Jowai, u Rimiki Lada Nanghuloo, Asst. Professor Physic Department, Kiang Nangbah Govt. College Jowai, ka Bakhianmon Rynjah, Associate Professor Sankardev College Shillong wa kamjooh leh na ka Professor Streamlet Dkhar.
I pynchongnia chongyurim ya i daw bah dawsan yong i hiardor ka Jaitbru Khasi-Jaiñtia ha kani ka juk wa katni katkam wa mih nei yaklam ki khon khynroo khyllood kamjooh ki bru stat bru chempang kyrpang leh na ka Professor Streamlet Dkhar, toh i yoobang yookwah yei yong kiwi, wym em i kitkhlieh ki khon ka ri yei miat i bha ka imlang sahlang wei wym skem yurim i manbru longbru kat chawa pait wa kyruiñ.
Ha kani ka sngi yei klam i kappæ yong ki khon khynroo khyllood wa yachimbynta dawan wow bichaar da u Riquoma Rq. Laloo, Headmaster Tep Kyndait School Tuber, u L. Lyngdoh, Jt. Director DSEL, West Jaiñtia Hills wa u R. Lamar, Retired Principal Williamson Sangma Govt. College, Tura wei da pynlai da u Rtn. Rudolf E.Laloo (PHF).
Yei naam Best Speaker yong kani ka yalang da rah da u Osmond Suchiang yong ka Kiang Nangbah Govt. College Jowai deiwa yoh 242 Point neitæ boodryngkhi won u Kynjailang Salahe, Kiang Nangbah Govt. College Jowai deiwa yoh kamai 190 Point wa u Quickly Pala, yong ka Thomas Jones Synod College, Jowai uwa da yoh 188 Point.
