Jowai: Ka Rotary Club Jowai kam kawi na ki seiñ krehmon sñiawbha wa em hapoh ka District wei kawa da leh da pyndep chiboon ki kaam heiyatoh wei myntoi kiwa chong chnong wei miat i bha ka imlang sahlang waroh, ha kani ka tayaw da yoh biang u sakhi ya ki kaam wabha kani ka seiñ ha chnong Mookaswan ya kawa datip kam ka Literacy Campaign nae ka thong wow kyntu kynrong yei em ki bru watip u thoh wei purae khamtam ha kani ka juk wache katni.
U Rtn. S.K Lato, President Elect MPHF hei klam yahkhmat kam u chongknor ha ka yachemlang wa kyrpang ya ki khynnah wa ki manbei manpa ka chnong Mookaswan kawa da man hei janmiet yong ka sngi Khyllaw 15 tarik u Khonchonglad da khanna pynsñiaw wa ki bor pynlai wa hakhliehdooh yong ka Rotary Club ha uni u snem da booh thong iwa hakhmatdooh i kamram wow leh u pyndep da ki Rotary Club wa em ha kylleiñ ki thaw toh wow pyndoohjait yei em ki bru wymtip u thoh u purae. Kamtae ka Rotary Club Jowai hajrong katae ka thong wa dakdaw dei sñiawkhia chim ko wow pynman ya kani ka prokram e sikai wa kyrpang ha chnong Mookaswan, ka chnong kawa dang em ya ki bru wymtip u thoh u purae neidaw waban i dooh wei tymbuiñ i man.
U waheh chnong ka Mookaswan waheh B. Shylla hei e kyntien, e u i sñiawngooh wa khroo ya ka Rotary Club Jowai kamjooh ya ki dkhot yong ka kiwa da chim ka yukit wakhia hei wow e ya kani ka kabu ksiar neibynta i miat i bha ki khon ka chnong waroh, wei da kyrsu kyntu joor u ya ki khon ka chnong wa wan cha kani ka prokram wow man ki kiwa yaichah wei wan tikna khnang wa man dakut kani ka prokram yow man sakhiat phi ki khon ka chnong ka thaw kiwa lait nei sahdoom, sahdien, sahbeij.
Ka Rotarian Ester F. Gatphoh MPHF AG Zone-XRID 3240 hawa e kyntien hakhap ki khynnah wa ki manbei manpa da ong ko kynmoo kani ka juk ka por ymtoh de ka wow yachonkti hawa lai cha ki yungkrehkaam ka sorkar neibynta ki waboon ki kaam. Kamtæ man iwa emkaam hadooh kattae kattae wow man ki bru kiwa tip u thoh u puræ, neitæ i daw ka Rotary Club Jowai dei sñiaw maya ya ka chnong Mookaswan chim ko wow pynman ya kani ka prokram Literacy Campaign, ka prokram kawa damang kyrpang heiwa da pynlut pynsep da ki dkhot ka Rotary Club Jowai. Ong chooh chooh ko leh kynmoo hawa em phi yei stad hakti, hawa man phi ki bru kiwa tip u thoh u purae, ki bru chimkabu ym yohlsad ki phi u pynbeij næ u phon chakæ.
Neiliang wan u Rtn. M.Passah, Chairman Literacy, PHF hei klam chwa wow yoh ki kyntien sñiawngooh na ka Rtn. S. Tariang, MPHF, da khana u wa ya kani ka prokram da pynman dei yarap kyllooid mynsien yong ki dkhot wei neiliang yong ki lada yoo ki wa dawa daw pteiñ chooh ki ya kani ka prokram hadooh wa ki bru wa wan chah sikai u man sakhiat ki kiwa tip u thoh u puræ.
Chooh chooh ha kani ka janmiet neiliang ka Rotary Club Jowai da e sñiawbha ko leh da ki Spainkhlieh cha ki mabbei, ki khyllood, katwa ya ki manpa wa ki khynnah wan da e ki da ki that sula, that patlun.
Ya kani ka prokram e sikai yong ka Rotary Club Jowai ha chnong Mookaswan da sdang nadooh u Naichiphaw yong uni u snem heiwa da booh ya ki ar ngut kiwa sikai katwa ki bru wa wan chah sikai em ki hadooh 40 ngut kynthuplang ki khynnah, manbei manpa wa ki khynroo khyllood wei da pynman leh hadooh le sien chitayaw ya kani ka prokram.
Discussion about this post