Jowai: Ka Seng Derew i War Jowai kawa toh ka seiñ kawa kdung ya ki khynnah puræ ka thaaiñ War Jaiñtia kiwa wan chong wasa ha sor Jowai neibynta wow pyndep ya ki puræ wei ha kani ka 29 tarik da pynman ko ya ka yachemlang kawa chisien chi snem ha District Library Auditorium, Mynthong, Jowai heiwa u montri ka sorkar jylla wa pait ya ka puræ puthi u Lahkmen Rymbui da man u kam u kongsan.
Ya ka Seng Derew i War Jowai da seiñ ha ka 2 tarik Naisaphra 2014 ryngkat ki kyntien im sngi wa ong, “Tu phrang tu phrang Derew War khlem ran” wei da yoh yei tipmit na ka sorkar ha ka 2 tarik Naisaphra 2015. Da seiñ ya ka hajrong ka yurim wow tip iwi ya iwi para War kiwa chong wa sah ha Jowai khang wow wanrah yei sñiaw chipayu wei wow wanrah yei mynsien yatylli hapyrdi ki khon ka thaaiñ War Jaiñtia wei khamtam wow pynneh pynsah ya ka ktien ka thylliej hanlada em cha baar u pood u ang ka thaaiñ War, da ong u Organising Secretary ka SDIW u Dapmon Syngkor.
U Lahkmen Rymbui hawa e yei klam da kyntu u ya ki khynnah puræ wow kheiñkor yei por neibhah wa man ko ka spah bah wow pynmiat yei rukom im. Da ban joor u ya ki wow syndong yei rukom im, khamtam ha kani ka juk neibhah wa boon ki khynnah wa da lai ha ka luti wa bakla.
Ha kani ka sngi da yoh i klam wa tbian na u MDC ka War West u Het Pohthmi, u Adviser SDIW u Kennedy Shylla wa ka Deiwi Tongper wei ya ka yalang da pynlai da u President ka seiñ u Besterwell Buam.
Ka Seng Derew i War ha kani ka sngi da pynkup burom ko ya ki 12 ngut ki khynnah kiwa wan chakhmat ha ka exam yong ki ha ki kyrdan waphær waphær heiwa da pynkup burom kyrpang ya u Rimiki Pohlong na ka Muktapur uwa wan ha ka kyrdan Top-20 yong ka Exam SSLC 2018.
Discussion about this post