Ka Seiñ Khynroo Khyllood Katholik Good Shepherd Parish Ladrymbai, Jowai Diocese ha ka 21 wa 22 tarik uni u bnai hapoh i yahkhmat u Ripos Lyngdoh kam u President wa u Wellson R D Siangshai kam u General Secretary da pynman ki ya ka yaseiñ Annual Feast Day lane ka Sngiburom ki Khynroo yong ka Parish wa jooh man chisien chisnem ha ka Balang Chnong Rangad hajrong ka phang: “Ngam lah ban leh ia kiei kiei ki bakhraw, hynrei nga kwah ban leh kiei kiei baroh, wat ia ka barit tam, naka bynta ka burom bakhraw jong u Blei” St. Dominic Savio.
Ha ka sngi sdang da em ka Mass Wakhooid wa leh da u Spiritual Youth Director, u Rev. Fr. Ebormitre H Lamare uwa man leh u Assistant Parish Priest pynbood sa i pynhær ya ka lama ka seiñ da u T. Suchiang kam u kongsan chirup wa i sneiñ i kyntu ya ki khon khynroo khyllood wow im bha im miat.
Ha kani ka yaseiñ da yoh i klam wa ki kyntien yalap na u Jimmy Pdang uwa man leh u muktiar naka chong Tluh, EJH kam u Resource Person hajrong ka phang “Ki samla ba laitluid”.
Ha ka sngi u Blai da pynkut da ka Mass Wakhooid, ka mane Sacrament wa i sneiñ i kroo na u Rev. Fr. Ebormitre H Lamare ryngkat i synraanlang u Rev. Fr. Aibor D Nongbah kam u Parish Priest.
Ha kani ka yaseiñ da wan chimbynta da ki khynroo na 24 tylli ki Balang chnong wa haap haka Parish Ladrymbai kiwa da em palat 230 ngut ki Delegate wei da pynman leh yaka Debate Competition hajrong ka phang “Child Marriage”, Bible Quiz Competition waka Bible Skit Competition heiwa haka Debate Competition, u Sanky Lyngdoh da yoh nyngkong u, u Vincent Rymbai hei wa ar katwa ka Youfreesia Dkhar hei wa le.
Haka Bible Quiz Competition da jop da ka Moolamanoh Circle wa da mihkhmat da u Weibanki Dkhar, u Kheinlang Khaii wa u Nicolas Sumer. Ka Pamra- Jalyiah Circle wa da mihkhmat da u Shaniahbha Shylla, u Edisuk Markus Dkhar wa u Donbokmiki Siangshai da yoh wa ar ki katwa hei wa le da jop ka Iongkaluh-Sanshnong Circle wa da mihkhmat da u Ridapmi Sana, u Ambrose Dkhar wa u Thehsbun Kyndait.
Ha ka Bible Skit Competition da yoh nyngkong daka Balang Chong Pamrakmai, wa ar ka Balang Chong Jalyiah katwa ka Balang Chong Iongkaluh da yoh wa le.
Da ya synraanlang wei e mynsien chooh chooh ya ki khon khynroo da ki Sister, Brother, Head Catechist, Waheh yong ka PPC, kiwa yahkhmat Balang ki rangbah ki manbei wa ki diah khian.
Da pynphooh pynphieñ ya kani ka yaseiñ da ki rwai wa ki chaad wei da e khublei sñiawngooh na u Wellson R D Siangshai wei da pynhaap ya ka lama ka seiñ da u Spiritual Youth Director.
